विकास गामणे ः सकाळ वृत्तसेवा

Maharashtra News : राज्यातील अनुसूचित जमातीमधील विद्यार्थ्यांना शासकीय आश्रमशाळेतच दर्जेदार शिक्षण मिळावे, या हेतूने मूलभूत सुविधा उपलब्ध असलेल्या शासकीय आश्रमशाळा ‘आदर्श’ म्हणून तयार करण्याचा निर्णय आदिवासी विकास विभागाने घेतला आहे.

त्यादृष्टीने २५० आश्रमशाळा आदर्श (मॉडेल) घोषित करण्यात आल्या आहेत. त्यापैकी ७३ आश्रमशाळांमध्ये ‘विज्ञान केंद्र’ उभारले जाणार आहेत. ही योजना एका वर्षात पूर्ण करावयाची आहे. ७३ पैकी नाशिक अपर आयुक्तालयातील ३० आश्रमशाळांचा यात समावेश आहे. (73 ashram schools in state have science centre maharashtra news)

आदिवासी विकास विभागांतर्गत ४९७ शासकीय आश्रमशाळा कार्यरत आहेत. आधुनिक काळातील बदलत्या आव्हानाचा सामना करण्यासाठी या शाळांमध्ये आमूलाग्र बदल करणे आवश्यक असून, शिक्षणातून विद्यार्थ्यांचा शारीरिक, बौद्धिक व मानसिक विकास होणे गरजेचे असल्याने पंतप्रधान नरेंद्र मोदी यांच्या वाढदिवसानिमित्त राज्यात नमो ११ सूत्री कार्यक्रम राबविण्याच्या अनुषंगाने नमो आदिवासी स्मार्ट शाळा अभियानांतर्गत आदिवासी स्मार्ट शाळांची उभारणी व ७३ विज्ञान केंद्राची उभारणी प्रस्तावास शासनाने मान्यता दिली आहे.

निवड झालेल्या २५० आदर्श आश्रमशाळांपैकी ७३ आश्रमशाळांमध्ये अद्ययावत प्रयोगशाळा उभारली जाणार आहे. शासकीय आश्रमशाळा मॉडेल स्कूलमध्ये रूपांतर करत असताना याठिकाणी विद्यार्थ्यांसाठी डिजिटल क्लासरूम, अद्ययावत संगणक कक्ष, सुसज्ज ग्रंथालय, कला व क्रीडा विभाग, अद्ययावत भोजनालय, सभागृह असणार आहे. या अत्याधुनिक सुविधांसोबतच या ७३ आश्रमशाळांमध्ये विज्ञानविषय माहिती देणारी अत्याधुनिक प्रयोगशाळा उभारली जाईल.

यात अंतराविषयक बाबी, यंत्रशाळा, टेलिस्कोप आदींचा समावेश असणार आहे. त्यासाठी निवड झालेल्या आश्रमशाळांतील शिक्षकांना प्रशिक्षण दिले जाणार आहे.

तसेच या आश्रमशाळेतील विद्यार्थ्यांचे मूल्यांकन केले जाईल. ७३ विज्ञान केंद्र उभारण्याच्या अनुषंगाने अंमलबजावणी आराखडा आदिवासी विकास विभागाने तयार करून त्यास मान्यता घ्यावी, त्यानंतर त्याची अंमलबजावणी करावी. याकरिता आदिवासी विभागाकडून निधी उपलब्ध करून दिला जाणार आहे.

अपर आयुक्तालयनिहाय आश्रमशाळा

नाशिक - ३०

ठाणे - १८

अमरावती - १३

नागपूर - १२

जिल्ह्यातील १३ आश्रमशाळा

ठाणापाडी, शिरसगाव, तोरंगण (त्र्यंबकेश्वर), कोहोर (पेठ), ननाशी, नाळेगाव (दिंडोरी), मुंढेगाव (नाशिक), कनाशी, चणकापूर, मोहनदरी (कळवण), सराड (सुरगाणा), दहिंदुले व साल्हेर (बागलाण).