देशात पाच राज्यांत विधानसभा निवडणूकांची रणधुमाळी सुरु आहे. जशा निवडणूका जवळ येत आहेत तसा या राज्यांतील राजकीय वातावरणाला रंग चढला आहे. सत्ताधारी आणि विरोधक यांच्यात एकमेकांवर टीका सुरु आहे. दरम्यान, गोव्यातील (Goa Election 2022) विधानसभेची तयारी अंतिम टप्प्यात आली आहे. त्यामुळे आता येथे नेतेमंडळींचे दौरे सुरु झाले आहेत. राष्ट्रवादीचे मंत्री नवाब मिलक यांच्यानंतर आता राज्याचे पर्यावरण मंत्री आदित्य ठाकरेही (Aaditya Thackeray) गोवा दौऱ्यावर जाणार आहेत.

शिवसेना मंत्री आदित्य ठाकरे दोन दिवस गोवा दौऱ्यावर जाणार आहेत. ११ आणि १२ फेब्रुवारीला आदित्य ठाकरे गोव्यात (Goa) असणार आहेत. गोव्यातील शिवसेना उमेदवारांच्या प्रचारासाठी आदित्य ठाकरे गोवा दौऱ्यावर जाणार असल्याची माहिती समोर येत आहे. दोन दिवसात वास्को, साखळी आणि पेडणे येथे प्रत्येकी एक अश्या तीन सभा ते घेणार आहेत. याशिवाय म्हापसा बाजारपेठेत घरोघरी जाऊन आदित्य ठाकरे शिवसेनेसाठी प्रचार करणार आहेत. आदित्य ठाकरेंच्या सीमोल्लंघनाच्या बातमीवर शिक्कामोर्तब झाला आहे. दरम्यान, महाराष्ट्राबाहेरील (Maharashtra) शिवसेनेच्या उमेदवारांच्या प्रचारासाठी जाणारे पहिले ठाकरे ठरले आहेत. आता या दौऱ्यात आदित्य ठाकरे कोणते निर्णय घेणार आणि आश्वासने देणार याकडे सर्वांचे लक्ष लागले आहे.

दरम्यान, राष्ट्रवादीचे नेते नवाब मलिक (Nawab Malik) हेही गोव्यात प्रचारसाठी जाणार आहेत. उद्या ते जाहीरनामा प्रसिद्ध करणार असल्याची माहिती त्यांनी दिली आहे. यावेळी कुणाला बहुमत मिळणार नसून गोव्यात (Goa Election 2022) सर्व पक्षांना एकत्र यावे लागेल, असे सूचक वक्तव्यही त्यांनी केले आहे.