मुंबईः विधीमंडळाचं पावसाळी अधिवेशन सुरु आहे. मिठी नदीच्या गाळ उपशाप्रकरणी एसआयटी चौकशी करण्याची घोषणा मंत्री उदय सामंत यांनी केली. त्यावरुन आदित्य ठाकरे आणि जितेंद्र आव्हाड यांनी माध्यमांशी संवाद साधला.

2005 पासून साल 2023 पर्यंत नदीचा सौंदर्यायासाठी किती खर्च झाला तसेच गाळ काढण्यावर किती खर्च झाला याबाबत एसआयटी मार्फत चौकशी करण्यात येणार आहे. आमदार प्रसाद लाड यांनी उपस्थित केलेल्या लक्षवेधीला सामंत यांनी उत्तर दिलं.

यासंबंधाची प्रश्न आदित्य ठाकरे यांना विचारला असता त्यांनी थेट मणिपूर मुद्द्याला हात घातला. ते म्हणाले की, मणिपूरमध्ये अशीच चौकशी लावली पाहिजे. तिथे महिलांवर अत्याचार होत आहेत, स्वांतत्र्य सैनिक आणि 'कारगिल'मधल्या सुभेदाराच्या पत्नीची धिंड काढून अत्याचार केला गेला. तरीही कुठे आवाज नाही. 'आप'च्या खासदाराला निलंबित केलं गेलं कारण ते चौकशीची मागणी करत होते. मणिपूरमध्ये, महाराष्ट्रात हुकूमशाही सुरु आहे. त्यामुळे आम्ही 'इंडिया' म्हणून लढत आहोत.

सभागृहात आमदारांना बोलू दिलं जात नाही, या मुद्द्यावरुन बोलतांना आदित्य ठाकरे म्हणाले की, एक मंत्री आहेत, ज्यांच नाव फुलावरुन आहे. परंतु ते काट्यासारखे वागत आहेत. प्रणिती शिंदे प्रश्न विचारत असतांना ते भडकले. त्यांचा अभ्यास कच्चा होता म्हणून आवाज दाबण्याचा प्रयत्न करत आहेत. भाजपच्याच आमदार देवयानी फरांदे त्यांच्यावरही ते मंत्री भडकले. उत्तरं येत नाहीत म्हणून दादागिरी करण्याचा प्रयत्न सुरु असल्याचा ठपका ठाकरेंनी ठेवला.