Ajit Pawar On Eknath Shinde : राज्याचे मुख्यमंत्री एकनाथ शिंदे सकाळी सहा वाजेपर्यंत काम करतात असं सांगितलं जातंय, पण मग मुख्यमंत्री कधी उठतात? असा खोचक सवाल विरोधी पक्ष नेते अजित पवार यांनी केला आहे. ते जळगावमध्ये बोलत होते. यावेळी त्यांनी वेदांता-फॉक्सकॉन प्रोजेक्टवरून शिंदे सरकारवर जोरदार हल्लाबोल करत वेदांता आणि फॉक्सकॉनबाबत तरूणांनी आवाज उठवणं गरजेचं असल्याचे पवार म्हणाले.

अजित दादा सकाळी सहा वाजता उठून काम करायचे असे विधान सुप्रीय सुळे यांनी केले होते. त्यावर दादा सकाळी सहा वाजता उठून काम करतात, ही चांगली गोष्ट आहे, पण मी ताईंना माहिती देतो की, हा एकनाथ शिंदे सकाळी सहा वाजेपर्यंत लोकांच काम करतो, आणि हे काम मी महाराष्ट्रासाठी करत राहाणार त्यामध्ये कोणताही खंड पडू देणार नाही अशा शब्दात एकनाथ शिंदेंनी उत्तर दिले होते. त्यानंतर आता स्वतः अजित पवारांनी शिंदेंच्या पहाटे सहापर्यंत काम करण्याच्या पद्धतीवर खोचक प्रश्न विचारत शिंदे पहाटे सहापर्यंत काम करतात मग उठतात कधी असा प्रश्न उपस्थित केला आहे.

काय म्हणाले होते शिंदे

काही दिवसांपूर्वी मुख्यमंत्री शिंदेंची पैठण येथे सभा पार पडली होती. त्यावेळी ते म्हणाले होते की, कोणाला काय वाटेल ते बोलू द्या, अजित दादा सकाळी सहा वाजता उठून काम करायचे असे सुप्रीया सुळे म्हणाल्या होत्या. आधी दादा टीका करायचे आता ताई देखील सुरू झाल्या आहेत. टीका करणं त्यांचं काम आहे, विकासाचं काम करत राहणे हे आमचं काम आहे, आम्ही कामातून उत्तर देऊ असे मुख्यमंत्री म्हणाले होते.

ताई म्हणाल्या की सहा वाजता उठून दादा काम करतात, ही चांगली गोष्ट आहे, पण मी ताईना माहिती देतो की हा एकनाथ शिंदे सकाळी सहा वाजेपर्यंत लोकांच काम करतो, आणि हे काम मी महाराष्ट्रासाठी करत राहाणार त्यामध्ये कोणताही खंड पडू देणार नाही अशा शब्दात त्यांनी राष्ट्रवादीच्या नेत्या सुप्रिया सुळे यांच्या टीकेला उत्तर दिले होते. त्यानंतर आता अजित पवारांनी शिंदेंवर पहाटेपर्यंत काम करण्यावरून हल्लाबोल केला आहे.