आयुष्यात कितीही मोठा टप्पा गाठला तरी प्रत्येकाला त्याच्या शालेय जीवनाच्या आठवणींना उजाळा देणे आनंददायी वाटते. राज्याचे उपमुख्यमंत्री अजित पवार यांनीही आज आपल्या शालेय आठवणींना उजाळा दिला. पन्नास वर्षांपूर्वीच्या शालेय जीवनातील क्षण त्यांच्या नजरसमोरून तरळून गेले.

बारामतीतील महाराष्ट्र एज्युकेशन सोसायटीच्या क्रीडावर्धिनिच्या वतीने आयोजित म.ए.सो. क्रीडाकरंडकाच्या पारितोषिक वितरणासाठी अजित पवार रविवारी उपस्थित होते. इयत्ता पाचवी ते दहावी पर्यंत अजित पवार बारामतीतील म.ए.सो. च्या शाळेत विद्यार्थी म्हणून शिकले. आजच्या कार्यक्रमादरम्यान शाळेने त्यांच्या काळातील त्यांचे नाव असलेले रजिस्टर आवर्जून त्यांना दाखविण्यासाठी आणले होते.

त्या रजिस्टरमधील त्यांनी त्यांच्या नावासह विद्यार्थी दशेत त्यांच्यासमवेत असलेल्या मित्रांच्या नावावरही नजर टाकत जुन्या आठवणींना उजाळा दिला.

या प्रसंगी केलेल्या भाषणामध्येही अजित पवार यांनी पोतनीस, बडवे, दंडवते, घारे या सारख्या गुरुवर्यांचाही त्यांनी आदराने उल्लेख केला. जून 1968 ते जून 1974 या काळात अजित पवार बारामतीतील म.ए.सो. विद्यालयात इयत्ता पाचवी ते दहावीपर्यंत शिकण्यासाठी होते. अकरावीला त्यांनी प्रवेश घेतला होता पण ते कोल्हापूरला शिक्षणासाठी गेल्याची माहिती संस्थेचे अध्यक्ष बाबासाहेब शिंदे यांनी दिली.

महाराष्ट्र एज्युकेशन सोसायटीने अनेक विद्यार्थी घडविले. यात अधिकारी, व्यावसायिक, उद्योजक, पत्रकार यांचा समावेश आहे, मात्र आजमितीस सर्वात सक्षम माजी विद्यार्थी म्हणून अजित पवारांचा उल्लेख बाबासाहेब शिंदे यांनी करताना त्यांनी शाळेच्या मुलभूत सुविधांच्या विकासासाठी हातभार लावण्याची अपेक्षा बोलून दाखवली.

अजित पवार यांनीही शाळेच्या व्यवस्थापनाने आराखडा तयार केल्यास इमारत व मुलभूत सुविधांसाठी मदत करण्याची ग्वाही दिली. ज्ञानदानाचा अखंड यज्ञ चालविणा-या या संस्थेस शक्य ती सर्व मदत करु असे ते म्हणाले.