CM Eknath Shinde News: शिवसेना पक्ष आणि धनुष्यबाण हे चिन्ह एकनाथ शिंदेंना द्यायचा निर्णय निवडणूक आयोगाने दिला. निवडणूक आयोगाच्या या निर्णयानंतर शिंदे गट चांगलाच अॅक्टिव्ह झाला आहे.

एकीकडे निवडणूक आयोगाने शिवसेना एकनाथ शिंदेंची असल्यावर शिक्कामोर्तब केलं, त्यानंतर लगेच शिवसेना आमदारांनी विधिमंडळ कार्यालयावर आणि संसदेतल्या शिवसेनेच्या कार्यालयावर ताबा मिळवला. यानंतर आता शिंदेंच्या टार्गेटवर असलेलं ठाकरेंच्या गटाचं आणखी एक पद धोक्यात आलं आहे.

विधान परिषदेमध्ये ठाकरे गटाचे नेते अंबादास दानवे यांच्याकडे विरोधी पक्षनेते हे पद आहे, पण या पदावरही ठाकरे गटाच पद हातचं जाण्याची शक्यता दिसून येत आहे.

निवडणूक आयोगाच्या निकालानंतर अंबादास दानवे हे सत्तापक्षाचा भाग झाले आहेत, त्यामुळे त्यांना विरोधी पक्षनेते पदावर ठेवू नये, अशी भूमिका शिवसेनेकडून घेतली जाऊ शकते. तसं झालं तर अंबादास दानवे यांचं विरोधी पक्षनेतेपद अडचणीत येण्याची शक्यता आहे.

यासंबधी अंबादास दानवे यांनी या मुद्द्यावर प्रतिक्रिया देताना म्हणाले की, मुख्यमंत्री एकनाथ शिंदे यांच्या गटाचा विधान परिषदेवर एकही आमदार नाही, त्यामुळे विरोधी पक्षनेता कोण असावा हा बोलण्याचा त्यांना अधिकार नाही, असं दानवे म्हणालेत.

याउलट निवडणूक आयोगाने आम्हालाच शिवसेना म्हणून मान्यता दिली आहे, त्यामुळे आमचाच व्हीप सगळ्या आमदार-खासदारांना मान्य करावा लागेल, असं शिवसेनेकडून (शिंदे गटाकडून) सांगण्यात येत आहे.

व्हीप मान्य केला नाही तर शिवसेनेकडून ठाकरेंच्या आमदार-खासदारांवर कारवाई करण्याचीही शक्यता आहे, त्यामुळे आदित्य ठाकरे आणि उद्धव ठाकरेंनी व्हीप झुगरला तर त्यांच्यावरही कारवाई होणार का? हे पाहणं महत्त्वाचं ठरणार आहे.

आदित्य ठाकरे हे विधानसभेचे वरळी मतदारसंघाचे तर उद्धव ठाकरे विधानपरिषदेचे आमदार आहेत.