महाराष्ट्र नवनिर्मान विद्यार्थी सेनेच्या अध्यक्ष पदी अमित ठाकरेंची (Amit Thackeray) नियुक्ती करण्यात आली आहे. या संदर्भात त्यांनी फेसबुक वर पोस्ट शेअर करत शैक्षणिक प्रश्न सोडवण्याचा प्रयत्न करणार असल्याचे म्हटले.

अमित ठाकरे त्यांच्या पोस्टमध्ये म्हणतात,“राज्यातील शिक्षण व्यवस्थेसमोर आज असंख्य आव्हानं आहेत. विद्यार्थी, पालक, शिक्षक या सर्वांनाच अनेक समस्यांना तोंड द्यावे लागत आहे. तरुण सहकाऱ्यांना सोबत घेऊन शैक्षणिक प्रश्न सोडवण्याचा मी प्रामाणिक प्रयत्न करणार.आपण सर्वांनी सहकार्य करावे,हीच अपेक्षा आहे.”

महाराष्ट्र नवनिर्माण सेनेकडून मराठी भाषा दिनाच्या मुहूर्तावर पक्षाकडून राज ठाकरे यांचे सुपूत्र असलेल्या अमित ठाकरें यांच्या खांद्यावर महाराष्ट्र नवनिर्माण विद्यार्थी सेनेच्या अध्यक्षपदाची जबाबदारी सोपवली. गेल्या काही काळापासून अमित ठाकरे हे राजकारणात चांगलेच सक्रिय झाले आहेत. महाराष्ट्र नवनिर्माण विद्यार्थी सेनेच्या रुपाने अमित ठाकरे यांना स्वत:ला सिद्ध करण्यासाठी आणखी एक संधी मिळाले आहे, या संधीचे सोने ते कितपत करतात, याकडे सर्वांचे लक्ष आहे.