Ashadhi Ekadashi : हातात भगवी पताका, टाळ-मृदंगाचा गजर, ज्ञानोबा-माऊली तुकारामाचा जयघोष करत वारकरी पंढरपूरमध्ये (Pandharpur) पोहोचले आहेत. आज रविवारी पहाटे मुख्यमंत्री एकनाथ शिंदे (Eknath Shinde) यांच्या हस्ते सपत्नीक पूजा करण्यात आली. यंदा आषाढीला कोविड-19 नियमांचं बंधन नव्हतं. तब्बल दोन वर्षांनी विठ्ठलाचं दर्शन घेतल्यानंतर वारकरी भावूक झाले.

दिल्ली दौरा आटपून मुख्यमंत्री एकनाथ शिंदे शनिवारी रात्री पुणेमार्गे पंढरपूरमध्ये पोहोचले. रात्री २ वाजता मुख्यमंत्री शासकीय विश्रामगृहातून विठ्ठल मंदिराकडे निघाले. पहाटे अडीच वाजता महापूजेला सुरुवात झाली. याप्रसंगी एकनाथ शिंदे यांचे पूत्र आणि खासदार श्रीकांत शिंदे (Shrikant Shinde) आणि अन्य कुटुंबीय उपस्थित होते.

महापूजेसाठी CM शिंदेंच्या नातेवाईकांची गर्दी, वारकऱ्यांची रांग थांबवली

आषाढी एकादशीची विठ्ठल-रुक्मिणीची शासकीय महापूजा करण्यासाठी मुख्यमंत्री एकनाथ शिंदे पहाटे मंदिरात पोहोचले. शिंदे यांच्यासह नातेवाईक आणि समर्थकांनीही गर्दी केल्याचं वृत्त असून त्यांच्या सेवेसाठी आंघोळीला जाणाऱ्या वारकऱ्यांची रांग काही वेळेसाठी थांबवण्यात आली होती. साम टीव्हीनं दिलेल्या वृत्तानुसार, मुख्यमंत्री शिंदेंपाठोपाठ चार टेम्पो ट्रॅव्हलरमधून नातेवाईक आणि समर्थक पोहोचले. यामुळं सेवेसाठी आंघोळीला जाणाऱ्या वारकऱ्यांची रांग थांबवली. यावरुन संतापलेल्या वारकरी आणि पोलिसांमध्ये वादावादी झाल्याचं पाहायला मिळालं.

दरम्यान, आषाढी एकादशीची श्री विठ्ठल रुक्मिणीची शासकीय महापूजा मुख्यमंत्र्यांच्या हस्ते तर कार्तिकी एकादशीची महापूजा उपमुख्यमंत्री यांच्या हस्ते करण्याची प्रथा आहे. आषाढीच्या महापूजेसाठी एकनाथ शिंदे दिल्ली दौरा आटपून शनिवारी रात्री पूणेमार्गे पंढरपूरमध्ये पोहोचले. रात्री २ वाजता मुख्यमंत्री शासकीय विश्रामगृहातून विठ्ठल मंदिराकडे निघाले. पहाटे अडीच वाजता महापूजेला सुरुवात झाली. मुख्यमंत्र्यांच्या हस्ते महापूजा संपन्न झाल्यावर वारकऱ्यांनी दर्शन घेतलं.