सध्या विवेक अग्निहोत्री यांनी दिग्दर्शित केलेला द काश्मिर फाईल्स हा चित्रपट चांगलाच चर्चेत आहे. या चित्रपटावरुन अनेक नवे वाद पेटत आहेत, सोबतच देशभरातील अनेक राज्यांनी हा चित्रपट करमुक्त करण्याचा निर्णय देखील घेतला आहे. दरम्यान नितेश राणे यांनी हा चित्रपट राज्यात करमुक्त करण्याची मागणी मुख्यमंत्र्यांकडे केली होती, मात्र ती पुर्ण झाली नाही. यानंतर आता नितेश राणे यांनी महाविद्यालयीन विद्यार्थ्यांना शंभर रुपयांत हा चित्रपट पाहाण्याची ऑफर दिली आहे.

आमदार नितेश राणे यांनी माहाविद्यालयीन तरुणांसाठी खास सवलत जाहीर केली आहे. या ऑफरनुसार लक्ष्मी थिएटर कणकवली येथे दिनांक २१-०३-२०२२ पासून सकाळी ९ व दुपारी १२ वाजताच्या शोमध्ये महाविद्यालयीन तरुणांना १०० रुपयांमध्ये द काश्मिर फाईल्स हा चित्रपट पाहाता येणार आहे. जास्तीत जास्त तरुणांनी हा चित्रपट पाहावा असे अवाहन केले आहे.

दरम्यान महाराष्ट्रातही चित्रपट करमुक्त करण्याची मागणी भाजपने केली होती. मात्र सध्या हा चित्रपट राज्यात करमुक्त केला जाणार नसल्याचे महाराष्ट्राचे उपमुख्यमंत्री अजित पवार (Ajit Pawar) यांनी काल स्पष्ट केलं, त्यांनी केंद्रा सरकारने कर सवलत दिल्यास सर्व राज्यांनाही लागू होईल असे म्हटले होते. उत्तर प्रदेशसह गोवा, मध्य प्रदेश, कर्नाटक, हरियाणा आणि गुजरात या भाजपशासित राज्यांनी हा चित्रपट करमुक्त केला गेला आहे.