पुणे : पंतप्रधान नरेंद्र मोदी (PM Modi) आज पुणे दौऱ्यावर आहेत. आज ते पुणे मेट्रोचं उद्घाटन देखील करणार आहेत. त्यावरूनच राष्ट्रवादीचे अध्यक्ष शरद पवार (Sharad Pawar) यांनी मोदींना खोचक टोला लगावला होता. त्यालाच आता भाजपकडून (BJP) उत्तर देण्यात आले आहे. भाजपच्या अधिकृत ट्विटर हँडलवरून पवारांवर निशाणा साधला आहे.

पुणे मेट्रोचं काम अद्यापही पूर्ण झालं नाही. तरीही पंतप्रधान मोदींच्या हस्ते मेट्रोचं उद्घाटन होत आहे, असा टोला पवारांनी लगावला होता. त्यालाच भाजपकडून उत्तर देण्यात आलं आहे. पुणे मेट्रोचे काम अर्धवट आहे तर लोक झोपेत असताना लपून-छपून ट्रायल तुम्हीच घेतली होती ना? असा सवाल भाजपकडून पवारांना विचारण्यात आला आहे. मोदी ज्या प्रकल्पाचे भूमीपूजन आणि लोकार्पण करतात ते तुम्हाला ५० वर्षांच्या कारकिर्दीत जमलं नाही. तुमची नेमकी हीच अडचण आहे, अशी टीकाही पवारांनी करण्यात आली.

शरद पवार नेमकं काय म्हणाले होते? -

पंतप्रधान नरेंद्र मोदी आज पुणे दौऱ्यावर आहेत. कर्वे रस्त्यावरील गरवारे महाविद्यालय येथे पुणे मेट्रोचे उद्घाटन करून ते मेट्रोने आनंदनगपर्यंतचा प्रवास करणार आहेत. पुण्यात शनिवारी एक कार्यक्रम आयोजित करण्यात आला होता. यावेळी पवारांनी मोदींना टोला लगावला होता. पंतप्रधान मोदी पुण्यात येऊन मेट्रोचं उद्घाटन करत आहेत. महिन्याभरापूर्वी मेट्रोच्या प्रमुखांनी मेट्रो दाखवायला नेलं होतं. पंतप्रधान ज्या मार्गाने जाणार आहेत, त्या रस्त्याने मी देखील गेलो आहे. यावेळी आमच्यासोबत आमचे काही सहकारी होते. मेट्रोलचं काम अद्यापही अपूर्णच आहे. काम अर्धवट असताना उद्घाटन होत आहे. माझी त्याबद्दल काही तक्रार नाही, असं पवार म्हणाले होते.