मुंबई: "अनंत गितेंनी (Anant geete) उल्लेख केला तो खरा आहे. शिवसेनेच्या आमदारांना (Shivsena mla) निधी देण्याबाबत अर्थमंत्री दुजाभाव करतात. म्हणून अनंत गिते बोलले शरद पवार (Sharad pawar) आमचे नेते होऊ शकत नाहीत" असे विधान परिषदेचे विरोधी पक्षनेते प्रवीण दरेकर (praveen darekar) म्हणाले. "गिते यांनी पाठीत खंजीर खुपसण्याचे वक्तव्य केले. हे राज्याचे सरकार बनवत असताना, कोणी कुणाच्या पाठीत खंजीर खुपसला?. सरकार मध्ये काय चालले हे सांगायला ज्योतिषी गरज नाही" असे दरेकर म्हणाले.

"सांगताही येत नाही आणि सहनही होत नाही, अशी अनंत गितेची अवस्था आहे. ते अडगळीत गेलेत, त्यांना काही स्थान उरलेलं नाही. त्यांचं वय झालय" अशी टीका गितेंवर केली. या टीकेनंतर राष्ट्रवादी, सुनिल तटकरे यांच्याबद्दल निषेधाचं एकही वक्तव्य येत नाही. या पक्षप्रमुखांच्या सूचना आहेत का? असा सवाल दरेकरांनी उपस्थित केला आहे.

"खरंतर शिवसेनेच्या स्थापनेत, बाळासाहेबांबरोबर अनंत गितेंनी अहोरात्र परिश्रम घेतले. कोकणातला कुणबी समाज त्यांच्या नेतृत्वाखाली एकटवला" अशा शब्दात दरेकरांनी अनंत गितेंचे कौतुक केले. "ते सहा ते सात वेळा खासदार होते. केंद्रात मंत्री होते. एकही भ्रष्टाचाराचा आरोप नाही. चारित्र्य संपन्न राज्यातल्या काही मूठभर लोकांमध्ये अनंत गिते मोडतात" असे दरेकर म्हणाले.