मुंबई : राज्यातील महानगरपालिकांच्या आगामी निवडणुकांसाठी विविध राजकीय पक्षांकडून तयारी सुरु झाली आहे. नवी मुंबई महानगरपालिकेची निवडणूक महाविकास आघाडी एकत्र लढवणार आहे. या निर्णयावर भारतीय जनता पक्षाच्या प्रदेश उपाध्यक्ष चित्रा वाघ ( Chitra Wagh) यांनी ट्विट करुन टीका केली आहे. त्या म्हणतात, महापालिका निवडणुकांमध्ये भाजपला चितपट करण्यासाठी महाविकास आघाडीचा मोठा निर्णय, एकत्र लढणार ? तुम्ही वेगवेगळे लढा, एकत्र लढा, तालिबानला घेऊन लढा, नाहीतर मुस्लिम लीगला घेऊन लढा, तुमचं पानिपत निश्चित आहे, असा इशारा चित्रा वाघ यांनी महाविकास आघाडीला (Mahavikas Aghadi) दिला आहे. (Chitra Wagh Challenge Mahavikas Aghadi For Upcoming Municipal Corporation Election)

नवी मुंबईत आज मंगळवारी (ता.२४) महाविकास आघाडीची बैठक पार पडली. यात आगामी नवी मुंबई महानगरपालिका निवडणूक आघाडी एकत्र लढवणार असल्याचा निर्णय घेण्यात आला आहे. यावेळी राष्ट्रवादी काँग्रेस पक्षाचे नेते शशिकांत शिंदे, शिवसेनेचे विजय नाहटा, काँग्रेसचे जिल्हाध्यक्ष अनिल कौशिक आदी उपस्थित होते.

या प्रसंगी ३१ मे रोजी जाहीर होणाऱ्या आरक्षणानंतर जागा वाटपाबाबत निर्णय घेतला जाईल असे सांगण्यात आले. राज्य निवडणूक आयोगाने राज्यातील स्थानिक स्वराज्य संस्थांच्या निवडणुका घेण्याच्या प्रक्रियेस सुरुवात केली आहे.