मराठा समाजाला आरक्षण मिळावं यासाठी अंतरवली सराटी गावातील मनोज जरांगे हे बऱ्याच दिवसांपासून उपोषणाला बसले आहेत. काही दिवसांपुर्वी जालन्यात मराठा आंदोलकांवर लाठीचार्ज करण्यात आला होता. त्यानंतर राज्यभरात मराठा आंदोलक आक्रमक झाले. त्यानंतर शिंदे-फडणवीस सरकारने शांततेची पवित्रा घेत, मनोज जरांगे यांच्या मागण्यांवर सकारात्मक पाऊल उचललं. नुकतंच मुख्यमंत्री एकनाथ शिंदे यांनी मनोज जरांगे यांच्याबद्दल महत्वाचं विधान केलंय. त्याचबरोबर मुख्यमंत्री एकनाथ शिंदे यांनी जरांगेंना मराठा आरक्षणासाठी तयार करण्यात आलेल्या कमिटीत येण्याची विनंती केली.

जरांगेबाबत बोलताना मुख्यमंत्री एकनाथ शिंदे म्हणाले की, "मनोज जरांगे पाटील यांनी वैयक्तिक स्वार्थासाठी आंदोलन केलेलं नाही. या मराठा समाजाला न्याय मिळाला पाहिजे यासाठी त्यांनी आंदोलन केलं. ही त्यांची भावना अत्यंत स्वच्छ आहे, स्पष्ट आहे. त्यामुळे सरकारने घेतलेली भूमिका देखील स्पष्ट आहे. असं थातूर मातूर वेळकाढूपणा करणारं हे सरकार नाही."

मुख्यमंत्री एकनाथ शिंदे यांनी मराठा आरक्षणावर निर्णय घेण्यासाठी शिंदे कमिटीचं गठण करण्यात आलं होतं. जरांगे यांनी या कमिटीमध्ये यावं अशी विनंती मुख्यमंत्री एकनाथ शिंदे यांनी केली. त्याचबरोबर मराठा आरक्षण कायद्याच्या चौकटीत कसं टिकवता येईल. तयार करण्यात आलेली तज्ञांची कमिटी मराठा समाज मागास कसा हे सिद्ध करण्यासाठी चर्चा करेल. मनोज जरांगे यांनी केलेल्या मागण्या मान्य करण्यात आल्या आहेत. (Latest Marathi News)

यावेळी मुख्यमत्री म्हणाले की मराठा आरक्षणाबाबत जो निर्णय घेऊ तो कायद्याच्या चौकटीत टिकला पाहिजे. आरक्षणाबाबत सरकार सकारात्मक आहे. मराठा विद्यार्थ्यांना सारथी आणि इतर सुविधा मिळाल्या पाहिजे. ३७०० अतिरिक्त पदे निर्माण करण्यात आली आहेत.