मुंबईः परवा गडचिरोली येथे शासन आपल्या दारी या कार्यक्रमाचं आयोजन करण्यात आलेलं होतं. त्या कार्यक्रमाला मुख्यमंत्री एकनाथ शिंदे यांच्यासह उपमुख्यमंत्री अजित पवार आणि दुसरे उपमुख्यमंत्री देवेंद्र फडणवीस यांची उपस्थिती होती.

आज धुळ्यात मुख्यमंत्री शिंदे आणि उपमुख्यमंत्री पवार यांच्या उपस्थितीत शासन आपल्या दारी कार्यक्रमाचं आयोजन करण्यात आलेलं होतं. या कार्यक्रमात एकनाथ शिंदे यांनी आपण घड्याळाकडे बघतच नाही रात्रंदिवस काम करतो, असं विधान केलं.

एकनाथ शिंदे बोलतांना म्हणाले की, शिवसेना आणि भाजपची आमची युती २५ वर्षांची आहे. आता शिवसेना-भाजपचे झेंडे लागलेले आहेत. परंतु लोकांना अंगवळणी पडायला वेळ लागतो. पुढच्या कार्यक्रमात राष्ट्रवादीचेही झेंडे लागतील.

ते पुढे म्हणाले की, आपलं सरकार हा विकासाचा त्रिशूळ आहे. जिकडे बघावं तिकडे आपल्या सरकारला पाठिंबा मिळत आहे. नरेंद्र मोदी यांच्यावर विरोधक आरोप करीत आहेत. त्यांचा संघर्ष मोठा आहे. बाळासाहेबांचं स्वप्नही मोदी साहेब पूर्ण करीत आहेत. अयोध्येतलं राम मंदिर, कलम ३७० हटवणं हे बाळासाहेबांचं स्वप्न होतं.

''आता महाराष्ट्रात अजितदादा विकासाला साथ देत सोबत आलेले आहेत. मी घडाळ्याकडे न बघता काम करतो. त्यामुळे राज्याला विकासाकडे नेण्याचं काम महायुती केल्याशिवाय राहणार नाही.'' मुख्यमंत्र्यांनी असं विधान केल्याने आश्चर्य व्यक्त होत आहे.

शासन आपल्या दारी हा कार्यक्रम लोकाभिमुख होत असून त्याला प्रतिसाद मिळत आहे. परंतु विरोधकांना याचा त्रास होत आहे, असं म्हणत त्यांनी मुख्यमंत्री एकनाथ शिंदे यांनी उद्धव ठाकरेंना लक्ष्य केलं. उद्धव ठाकरेंनी विदर्भापासून पक्षबांधणीच्या कामाला सुरुवात केलेली आहे.