पुणे : छत्रपती शाहू महाराज संशोधन प्रशिक्षण मानव विकास संस्थेच्या (सारथी) कारभारावर शंका उपस्थित करून घातलेले सर्व निर्बंध उठविण्यात आले आहेत. अशी माहीती मंत्री नितीन राऊत यांनी दिली आहे. त्यामुळे 'सारथी'च्या विविध योजनांचा लाभ घेणाऱ्या विद्यार्थ्यांना विद्यावेतन देण्याचा मार्ग मोकळा झाला आहे. यामुळे राज्य सरकारने घेतलेल्या या निर्णयाबाबत विद्यार्थ्यांनी आनंद व्यक्त केला आहे.
'सारथी'चे व्यवस्थापकीय संचालक डी. आर. परिहार यांनी त्यांच्या पदाचा राजीनामा राज्याच्या मुख्य सचिवांकडे पाठविला असून, कार्यमुक्त करण्याची विनंती केली आहे. मात्र, परिहार यांच्या प्रयत्नातूनच संस्था वेगाने कार्यरत झाली असून, विद्यार्थी हिताच्या योजना राबविल्या जात आहेत. त्यामुळे परिहार यांनी राजीनामा मागे घ्यावा, अशी मागणी विद्यार्थ्यांकडून केली जात आहे.
काय आहे सारथी - दरम्यान, राज्यभर निघालेल्या मराठा क्रांती मोर्चानंतर मराठा आणि कुणबी मराठा समाजातील तरुणांच्या सर्वांगीण विकासासाठी 'सारथी' संस्थेची स्थापना करण्यात आली. सामाजिक न्याय व विशेष सहाय्य विभागाकडून २०१९-२० यंदा सारथी संस्थेसाठी ५० कोटी रुपयांची अर्थसंकल्पीय तरतूद करण्यात आली आहे. त्यापैकी आतापर्यंत १२ कोटी ६७ लाख रुपये संस्थेला वितरित करण्यात आले आहे. या माध्यमातून 'सारथी' प्रशासनाने तरुणांसाठी विविध योजना राबविण्यास सुरुवात केली आहे.
दरम्यान, जवळपास अडीचशे तरुणांना स्पर्धा परीक्षेच्या तयारीसाठी दिल्लीला पाठविले असून, संशोधनासाठीही प्रोत्साहन दिले जात आहे. २१ नोव्हेंबरपासून ओबीसी मंत्रालयाच्या प्रधान सचिवांचे सही असलेले पत्र 'सारथी'ला प्राप्त झाले. या पत्रात 'सारथी'वर निर्बंध घातल्याचे कळविण्यात आले होते. तीन डिसेंबरच्या पत्रात 'सारथी'ची स्वायत्तता रद्द केली होती. या निर्बंधाचे तीव्र पडसाद राज्यभर उमटले होते.
त्या पार्श्वभूमीवर नागपूर येथे सुरू असलेल्या हिवाळी अधिवेशनात विधान परिषदेत अनेक नेत्यांनी दाखल केलेल्या लक्षवेधीनंतर 'सारथी'वरील निर्बंध हटवण्याचे आदेश संबंधित खात्याचे मंत्री डॉ. नितीन राऊत यांनी दिले. त्यानुसार तीन डिसेंबरच्या पत्राला स्थगिती देण्याच्या कार्यालयीन आदेश प्रधान सचिव जे. पी. गुप्ता यांनी १८ डिसेंबरला सायंकाळी दिल्याचे सूत्रांनी सांगितले.
या संस्थेअंतर्गत केंद्रीय लोकसेवा आयोग, महाराष्ट्र लोकसेवा आयोग ,बँकिंग सेट-नेट, पीएचडीचे मोफत मार्गदर्शन व संशोधन करणाऱ्या विद्यार्थ्यांची गैरसोय या आदेशामुळे टळली असून, विद्यार्थ्यांमध्ये आनंदाचे वातावरण पसरले आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.