वर्धा: आजी-आजोबाकडे राहण्यासाठी गेलेल्या अल्पवयीन नातीवर तिच्या ७० वर्षीय आजोबाने अत्याचार केला. ही घटना वर्धा शहरात उघडकीस आली. घटना उजेडात येताच अत्याचार करणाऱ्या वृद्ध आजोबाने पलायन केले. मुलीने दिलेल्या तक्रारी वरून शहर पोलिसात गुन्हा नोंद करण्यात आला.

प्राप्त माहितीनुसार, १६ वर्षीय पीडितेच्या वडिलांची नोकरी रायपूर जिल्ह्यातील सड्डू येथे असल्याने ती कुटुंबासह तेथेच राहते.पीडितेच्या आई व वडिलांचे घर वर्ध्याला असल्याने पीडिता आई व वडिलांसह वर्ध्याला येणे जाणे होते.

७ डिसेंबर २०२२ मध्ये पीडितेच्या आईच्या आजीचे निधन झाल्याने सर्व कुटुंबीय वर्धा येथे आले होते. दरम्यान, पीडिता ही वरील खोलीत आराम करीत असताना ७० वर्षीय नराधम आजोबाने खोलीत प्रवेश करून पीडितेचे लैंगिक शोषण केले.

पीडितेने बदनामी आणि भीतीपोटी ही बाब आई-वडिलांना सांगितली नव्हती. मात्र, पीडितेवर मानसिक उपचार सुरू असताना तिने मागील काही वर्षांपासून तिच्यासोबत सुरू असलेला हा धक्कादायक प्रकार मानसिकरोग तज्ज्ञांसमोर कथित केला अन् हे बिंग फुटले.

मागील सहा वर्षांपासून पीडितेवर आजोबा अत्याचार करीत असल्याने ती डिप्रेशनमध्ये गेली होती. कुणालाही ही बाब तिला सांगता देखील येत नव्हती. अखेर बिंग फुटले अन् हा धक्कादायक प्रकार उजेडात आला. पीडितेने आई-वडिलांना सर्व घटना सांगितल्याने वडिलांनी थेट शहर पोलिस ठाणे गाठले. शहर पोलिसांनी याप्रकरणी ७० वर्षीय नराधम आजोबाविरुद्ध अत्याचारासह पोस्को कायद्यान्वये गुन्हा दाखल केल्याची माहिती दिली.

आत्महत्येचा प्रयत्न

डिप्रेशनमध्ये गेलेली पीडिता ही खचून गेली होती. तिच्यापुढे कुठलाही मार्ग नव्हता. घरच्यांना ही बाब ती सांगू शकत नव्हती. अखेर पीडितेने स्वत:ला संपविण्याचा विचार केला.

पीडितेचे फेब्रुवारी २०२३ मध्ये दहावीची सराव परीक्षा सुरू असताना तणावातून स्वत:च्याच हातापायावर ब्लेडने चिरे मारून आत्महत्या करण्याचा प्रयत्न केला अखेर हे विदारक चित्र तिच्या आई-वडिलांना दिसले.

आई-वडिलांनी पीडितेला विचारणा केली पण, पीडितेने घडत असलेला प्रकार सांगितला नाही. अखेर घरच्यांनी पीडितेला मानसोपचार तज्ज्ञाकडे नेले आणि त्यानंतर हा प्रकार उजेडात आला.