मुंबई : संपूर्ण महाराष्ट्रात चर्चेचा विषय ठरलेल्या पूजा चव्हाण मृत्यू प्रकरणात आज, पहिल्यांदाच उपमुख्यमंत्री अजित पवार यांनी प्रतिक्रिया दिली आहे. मुंबईत त्यांनी पत्रकारांशी संवाद साधला. त्यावेळी त्यांनी राज्यमंत्री संजय राठोड यांच्यासह पूजा चव्हाण प्रकरणाच्या चौकशीवरही भाष्य केले. एखाद्या प्रकरणात संपूर्ण चौकशी झाल्याशिवाय कोणालाही दोषी ठरवू नये, असं मत अजित पवार यांनी व्यक्त केलं. मंत्री संजय राठोडे हे बेपत्ता नाहीत, संपर्कात आहेत, असंही त्यांनी यावेळी स्पष्ट केलं.

आणखी वाचा - पूजा चव्हाणच्या मोबाईलमध्ये दडलंय काय?

मुंडे प्रकरणात काय झालं?
अजित पवार म्हणाले, 'मंत्री संजय राठोड यांचा राजीनामा मागितला जात आहे. पण, एखाद्या व्यक्तीची संपूर्ण चौकशी झाल्याशिवाय आपण, त्याला दोषी कसं ठरवणार. यात कोणालाही पाठिशी घालण्याचा प्रश्नच नाही. मुळात धनंजय मुंडे प्रकरणातही असच झालं. काही माहिती न घेता जर, मुंडे यांचा राजीनामा घेतला असता तर काय झालं असतं? त्या प्रकरणात नंतर त्याच मुलीनं स्टेटमेंट बदललं. त्यामुळं जोपर्यंत चौकशीचा अंतिम अहवाल येत नाही. तोपर्यंत पेशन्स ठेवायला हवेत.' संजय राठोड हे शिवसेनेचे नेते आहेत. शिवसेना पक्षच त्यांच्याबाबत निर्णय घेऊ शकतो. पण, तटस्थ व्यक्ती म्हणून, मला या प्रकरणात पेशन्स ठेवायला हवेत, असं वाटतं, असं पवार यांनी यावेळी स्पष्ट केलं.

तपास सुरू आहे
पुणे पोलिस या प्रकरणाची संपूर्ण चौकशी करत आहेत. तपास योग्य दिशेने सुरू आहे. यात एका व्यक्तीला ताब्यात घेण्यात आलंय. दुसऱ्या व्यक्तीचा शोधही सुरू आहे. पोलिस खात्यातील वरिष्ठ अधिकारी पुण्याला जाऊन आले. त्यांनी या संपूर्ण प्रकरणाची माहितीही घेतली आहे, अशी माहिती अजित पवार यांनी या वेळी दिली.

आणखी वाचा - कोण होती पूजा चव्हाण?

'पुण्यात मी माहिती घेईन'
मीडिया ट्रायलवरूनही अजित पवार यांनी झापले. सार्वजनिक क्षेत्रात काम करत असताना अनेकदा एखाद्याला टार्गेट कऱण्यात येतं. तेव्हा व्यक्ती पुढे न येता काही काळ बाजूला राहते. याआधी धनंजय मुंडे हे सुद्धा स्पष्टीकरण दिल्यानंतर बाजूला राहिले होते असंही अजित पवार यांनी सांगितले. अधिक माहिती विचारली असता अजित पवार म्हणाले, 'गुन्हा जिथं घडला तिथले पोलिसच याबद्दल सांगू शकतील. मी गृहमंत्री नाही पण मी पुण्याला गेल्यानंतर पोलिसांकडून माहिती घेईन. आढावा घेतल्यानंतर त्याची चौकशी किती दिवस चालेल? काय परिस्थिती आहे हे पाहीन.'