भाजपची सत्ता असलेल्या राज्यातील मुख्यमंत्र्यांसाठी दिल्लीतील भाजप कार्यालयात मुख्यमंत्री परिषद आयोजित करण्यात आली होती. या परिषदेत भाजपचे राष्ट्रीय अध्यक्ष जे.पी.नड्डांसह पंतप्रधान नरेंद्र मोदीही उपस्थित आहे. दरम्यान, या परिषदेत उत्तर प्रदेशचे मुख्यमंत्री योगी आदित्यनाथ, उत्तराखंडचे मुख्यमंत्री पुष्कर सिंह धामी, हिमंता बिस्वा सरमा, गुजरातचे मुख्यमंत्री भूपेंद्र पटेल, हरियाणाचे मुख्यमंत्री मनोहर लाल खट्टर यांच्यासह महाराष्ट्राचे उपमुख्यमंत्री देवेंद्र फडणवीसही उपस्थित होते. (devendra fadnavis present in Mukhyamantri Parishad of BJP in delhi)

दरम्यान, दिल्लीतील मुख्यमंत्री परिषदेसाठी महाराष्ट्राचे मुख्यमंत्री एकनाथ शिंदे मात्र उपस्थित नव्हते. त्यामुळे या मुद्द्यावरून आता राजकीय वर्तुळात चर्चांना उधाण आलं आहे. यासंदर्भात, सेनेच्या नेत्या मनिषा कायंदे यांनी ट्वीट करत भाजप आणि मुख्यमंत्री एकनाथ शिंदेंसह फडणवीस यांना टोला लगावला आहे.

कायंदे ट्वीटमध्ये म्हणतात की, भारतीय जनता पक्षाकडून मुख्यमंत्री परिषदेचे आयोजन केले होते. मात्र यासाठी उपमुख्यमंत्री देवेंद्र फडणवीस यांनी मुख्यमंत्री म्हणून उपस्थिती लावली की काय? म्हणजे एकनाथ शिंदे नावालाच मुख्यमंत्री आहे तर.. असे म्हणत त्यांनी टोमणा मारला आहे. त्यामुळे आता यावरुन अनेक चर्चांना ऊत आला आहे.

गिरीश महाजनांचं स्पष्टीकरण

मनिषा कायंदे याच्या ट्वीटनंतर भाजपचे नेते गिरीश महाजन यांच्याकडून स्पष्टीकरण देण्यात आले आहे. "ही बैठक भाजपची होती, सरकारी पातळीवर नाही. त्यामुळे या बैठकीला केवळ भाजपचे मुख्यमंत्री आणि उपमुख्यमंत्री उपस्थित होते. मनीषा कायंदे यांनी 'ट्रोल' गिरी न करता थोडी माहिती घेऊन बोलले तर बरे होईल", अशा शब्दात त्यांना उत्तर दिले आहे.

भाजपच्या या मुख्यमंत्री परिषदेच पंतप्रधान मोदी आणि जे. पी. नड्डा यांनी उपस्थित राज्यातील सर्व मुख्यमंत्र्यांना मार्गदर्शन केले आहे. आप-आपल्या राज्यात राबवलेल्या कल्यणाकारी योजनांविषयी या परिषदेत अहवाल सादर करण्याच्या सूचना या परिषदेत देण्यात आल्या आहेत अशी माहिती मिळाली आहे. आगामी विधानसभा निवडणुकांना डोळ्यांसमोर ठेवून या परिषदेचे आयोजिन करण्यात आले होते. याशिवाय विविध योजनांविषयी पंतप्रधान नरेंद्र मोदींनीही या परिषदेत चर्चा केली आहे.