धनंजय मुंडे सध्या राज्याचे कृषिमंत्री आहेत आणि बीड जिल्ह्यातलं एक मोठं नाव आहे. आणि सर्वात महत्वाचं म्हणजे राज्यात सत्तेत असलेल्या राष्ट्रवादी काँग्रेसचा एक आश्वासक चेहरा आणि अजितदादांचे कट्टर समर्थक आहेत. म्हणजे अजितदादांनी आतापर्यंत ज्या ज्या भूमिका घेतल्या आहेत. त्या त्या भूमिकांमध्ये धनंजय मुंडेंनी वेळोवेळी मोठमोठ्या भूमिका घेत त्यांना पाठिंबा दिला आहे. पण, याच धनंजय मुंडेंचं राजकीय वजन वाढलंय कारण अजितदादांनी मोठी जबाबदारी मुंडेंवर सोपवली आहे. आता ही जबाबदारी नेमकी काय? मुंडेंचं राजकीय वजन कसं वाढलं तेच जाणून घेऊयात-

धनंजय मुंडे, राज्याचे विद्यमान कृषीमंत्री, परळीतून आमदार आहेत. स्वर्गीय भाजप नेते गोपीनाथ मुंडेंचे पुतणे आहेत. अजितदादांचा एक विश्वासू साथीदार अन् कट्टर समर्थक म्हणूनही त्यांच्याकडे पाहिलं जातं. कारण अजितदादांच्या प्रत्येक चढ-उतारात ते सावलीसारखेही उभे राहिलेत. म्हणजे अजितदादांनी जेव्हा २०१९ साली फडणवीसांसोबत पहाटेचा शपथविधी घेतला त्यावेळी शपथग्रहण सोहळ्याआधी आमदारांना एकजूट करण्याचं मोठं काम मुंडेंनी केलं होतं, असं राजकीय जाणकार सांगतात. २०१९ साली भाजप आणि राष्ट्रवादीचं सरकार सत्तेत आणण्यातही मुंडेंचीच भूमिका होती, अशीही चर्चा त्यावेळी रंगली होती. तरी, धनंजय मुंडेंची राजकीय कारकीर्दही समजून घेऊयात-

खरंतर मुंडेंच्या राजकीय प्रवासाची सुरुवात जिल्हा परिषद सदस्य पदापासून झाली. १९९५च्या विधानसभा निवडणुकीपासून ते राजकारणात सक्रीय आहेत. सुरुवातीला ते भाजपात होते. भारतीय जनता पक्षाचे विद्यार्थी आघाडी प्रमुख म्हणून राहिलेत. त्यानंतर भारतीय जनता युवा मोर्चाचे उपाध्यक्ष, प्रदेश सरचिटणीस आणि प्रदेशाध्यक्ष या पदांवर अनेक वर्ष त्यांनी काम केले. त्यानंतर विधानपरिषदेवर निवड झाली. विधानपरिषदेचे विरोधी पक्षनेतेपद सांभाळलेल्या धनंजय मुंडेंनी सभागृहात आणि सभागृहाबाहेर सरकारला आपल्या आक्रमक भाषणांनी सळो की पळो करुनही सोडलं. त्यामुळे मुंडेंचा आक्रमक बाणा अनेकदा पाहायला मिळतो.

पण पुढे याच धनंजय मुंडेंनी २०१२ साली भाजपाला सोडचिठ्ठी देत शरद पवारांच्या उपस्थितीत राष्ट्रवादीत प्रवेश केला. मग अजितदादांचा विश्वास संपादित करत ते आज सावलीसारखे अजितदादांच्या पाठीशी उभे राहिलेले दिसतात. आणि अशाच आपल्या खास अन् कट्टर साथीदार धनंजय मुंडेंचंही आता दादांनी राजकीय वजन वाढवलंय.

कारण शिंदे-फडणवीसांच्या सत्तेत सामील होताना अजितदादा उपमुख्यमंत्री झाले तर, धनंजय मुंडे नाही त्यांनी कृषीमंत्री केलं आणि आता पक्षात फूट पडल्यानंतर राष्ट्रवादीचं नाव, चिन्ह आणि पक्षाचा झेंडा मिळाल्यानंतर अजितदादांनी याच धनंजय मुंडेंवर मोठी जबाबदारी सोपवली आहे. ती म्हणजे आगामी २०२४च्या लोकसभा निवडणुकीसाठी राष्ट्रवादी काँग्रेस पार्टीचे प्रचारप्रमुख म्हणून धनंजय मुंडेंची नियुक्ती करण्यात आली आहे. देवगिरी या अजितदादांच्या शासकीय निवासस्थानी छोटेखानी कार्यक्रमात मुंडेंच्या नियुक्तीचं पत्रही देण्यात आलं. त्यामुळे अजितदादांचा कट्टर साथीदार असणाऱ्या मुंडेंचं राजकीय वजन चांगलंच वाढलेलं दिसतंय.