मुंबई: "पुणे, पिंपरी-चिंचवड महापालिका निवडणुकीसाठी (local body election) शिवसेना, (shivsena) राष्ट्रवादी काँग्रेस आणि काँग्रेस आम्ही जुळवून घेण्याचा प्रयत्न करु. पुणे-पिंपरी चिंचवडमध्ये पुढचा महापौर आमचाच असेल" असा दावा शिवसेना नेते आणि खासदार संजय राऊत (sanjay raut) यांनी केला आहे. पुण्यात (pune) शिवसेनेचा महापौर असावा, अशी पुणेकरांची इच्छा असल्याचे राऊत म्हणाले.

"देशात, राज्यात खूप पॅटर्न झाले. पण सध्या ठाकरे-पवार पॅटर्नचा बोलबाला आहे. ठाकरे-पवार पॅटर्न हा सध्याचा महाराष्ट्राच्या राजकारणातील चलनी पॅटर्न आहे. हे दोन पक्ष आणि काँग्रेस एकत्र आले, तर काय होऊ शकते, हे दिसलं आहे. मतांचं विभाजन होऊ देणार नाही" असे राऊत म्हणाले.

"वीर सावरकरांबद्दल शिवसेनेची कायम तीच भूमिका राहिली आहे. वीर सावरकर आमचे आदर्श आहेत" असे संजय राऊत म्हणाले. "मोहन भागवत आणि संघाला सावरकरांविषयी प्रेम आलं आहे, त्याचं आम्ही स्वागत करतो" असे राऊत म्हणाले.

"राजकारण, तुरुंगवासात असताना काहीवेळा रणनीती ठरवावी लागते. दहावर्षापेक्षा जास्त काळ तुरुंगात काढल्यानंतर बाहेर येऊन कार्य करावं, असं वाटलं. अशा परिस्थितीत जगभरात तुरुंगाबाहेर पडण्याचे जे मार्ग आहेत, तो मार्ग अवलंबला म्हणून त्याचा अर्थ सावरकरांनी माफी मागितली असा होत नाही" असे संजय राऊत म्हणाले.