मुंबई : शिवसेनेचा बालेकिल्ला असलेल्या ठाणे महापालिकेवर अनेक वर्षांपासून सत्ता आहे. महापालिकेच्या २०१७ मधील निवडणुकीत शिवसेनेला सत्ता मिळवून देण्यात एकनाथ शिंदे (Eknath Shinde) यांनी महत्त्वाची भूमिका बजावली होती. आज तेच नगरविकास मंत्री शिंदे पुन्हा चर्चेत आले आहेत. त्यांच्यासह शिवसेनेचे काही आमदार सध्या नाॅटरिचेबल आहेत. त्यामुळे महाराष्ट्रातील महाविकास आघाडी सरकार (Maharashtra Aghadi Government) टिकेल की पडणार हा प्रश्न उपस्थित केला जात आहे. (Eknath Shinde Strategy Was Successful, Shiv Sena Won Thane Municipal Corporation)

ठाणे महापालिकेची २०१७ मध्ये पार पडलेल्या निवडणुकीत एकनाथ शिंदे यांनी संकटमोचकाची भूमिका बजावली होती. ही निवडणूक शिवसेना आणि भाजप या दोन्ही पक्षांनी स्वबळावर लढवली होती. ठाणे (Thane) शहरातून भाजपचा आमदार निवडून आल्याने पक्षाचा आत्मविश्वास वाढला होता. यामुळे भाजप काही तरी चमत्कार घडवेल अशी चर्चा होती. अन्य पक्षांमधून अनेक उमेदवार त्यांनी आयात केले होते.

भाजप आणि राष्ट्रवादी काँग्रेस पक्षाला रोखणे हे शिवसेनेसमोर मोठे आव्हान होते. मग अशा वेळी शिवसेनेची मजबूत पक्ष बांधणी आणि बंडखोरांना शांत करण्यात शिवसेनेला मोठे यश मिळाले. यातून पुन्हा एकदा एकनाथ शिंदेंचे नेतृत्व सिद्ध झाले होते.