कोल्हापूर: एसटी कर्मचाऱ्यांना उसकावण्याचे काम काही जणांकडून केले जात आहे. शरद पवार यांनी एसटी कर्मचाऱ्यांचे प्रश्न सोडविण्याचा प्रयत्न केला आहे. मात्र एसटी कर्मचाऱ्यांनी आज त्यांच्या घरावर हल्ला केला हे योग्य नाही. आज महाराष्ट्राला कलंक लागला आहे. शरद पवारांचा (Sharad Pawar) कोणताही संबंध नसताना त्यांच्या घरावर हल्ला केला हे दुर्दैवी आहे. याच्या पाठीमागे नेमके कोण आहे याचा तपास करावी अशी आग्रही मागणी ग्रामविकासमंत्री हसन मुश्रीफ (Hasan Mushrif) यांनी केली.

पुढे ते म्हणाले, शरद पवारांनी नेहमीच एसटी कर्मचाऱ्यांना प्राधान्य दिले आहे. त्यांच्यामुळेच आज एसटी कर्मचाऱ्यांना शासनाचा पगार मिळतो आहे. मात्र आज या पद्धतीने एसटी कर्मचाऱ्यांनी शरद पवार यांच्या घरावर हल्ला केला हे अशोभनीय आहे.

भाजपवर टीका करताना ते म्हणाले, यामागे नक्कीच कोणीतरी वेगळा सूत्रधार आहे. भाजपाने या कर्मचाऱ्यांना पहिल्यापासूनच खोटी आश्वासने स्वप्न दाखवली त्याचं उग्र स्वरूप आज पहायला मिळालं. या संपूर्ण घटनेची चौकशी केली पाहिजे अशी मागणी मुश्रीफ यांनी केली. भाजपने पाच वर्षात का विलगीकरण केलं नाही असा प्रश्नही त्यांनी यावेळी उपस्थित केला.