पुणे: यशवंतराव होळकरांचा किल्ला सुबेदार होळकरांनी बांधला आहे. यशवंतराव होळकरांनी सलग २५ इंग्रजांशी लढा दिला आहे आणि तो जिंकलाही आहे. आता तो किल्ला राज्य सरकारने ताब्यात घ्यावा अशी मागणी भाजपा नेते गोपीचंद पडळकर (Gopichand Padalkar) यांनी केली आहे. आज पुण्यात माध्यमांशी बोलताना त्यांनी हि मागणी केली.

विधानभवनासमोर गोपीचंद पडळकर आंदोलन करणार आहेत. वाफगावमधील यशवंतराव होळकर यांचा किल्ला रयत शिक्षण संस्थेच्या ताब्यातील किल्ला सरकारने ताब्यात घ्यावा अशी मागणी केली आहे. यावेळी त्यांनी राष्ट्रवादीचे अध्यक्ष शरद पवार (Sharad Pawar) यांच्यावर निशाणा साधला आहे.

पडळकर म्हणाले, शरद पवारांना बहुजनांचा इतिहास मोडीत काढायचा आहे. समाजाचा विरोध असतानाही पुण्यश्लोक अहिल्यादेवींच्या पुतळ्यांचे उद्घाटन त्यांनी केले. महाराज यशवंतराव होळकरांचा जन्मस्थान असलेला वाफगावचा किल्ला त्यांनी ताब्यात ठेवला आहे. करायचं एक अन दाखवायचं एक अशी त्यांची प्रवृत्ती आहे असा टोलाही त्यांनी हाणला. मात्र आम्ही समाजातील जेष्ठांनी, होळकर घराण्यातील व्यक्तीशी चर्चा करणार आहोत. आम्ही आता लोकवर्गणीतून किल्ल्याचा जिर्णोद्धार करणार असल्याचेही त्यांनी सांगितले.

शरद पवार यांच्यावर निशाणा साधताना ते म्हणाले, जेजुरीत जाता पण वाफगावच्या किल्ल्याबद्दल तुम्ही बोलत नाही. आता किल्ला राज्य सरकारच्या ताब्यात द्या, अन्यथा आम्ही ताब्यात घेऊन किल्ल्याचा जिर्णोद्धार करू, असा इशारा गोपीचंद पडळकरांनी दिला आहे.