जालना : राज्यात कोरोनामुळे झालेल्या मृत्यूंची आकडेवारी लपविल्याचा आरोप विरोधी पक्षाकडून केला जात आहे. त्यावर राज्याचे आरोग्यमंत्री राजेश टोपे (Rajesh Tope) यांनी उत्तर दिले आहे. विरोधकांकडून राज्य सरकारवर करण्यात येणाऱ्या आरोपांचे खंडन केले आहे. राज्य सरकारने कोरोनामुळे (Death Due to Corona) मृत्यू झालेल्य़ांची कुठलीही आकडेवारी लपवलेली नाही, अशी माहिती राजेश टोपे यांनी दिली आहे. ते जालन्यात बोलत होते.

भारतात ओमिक्रॉन (Omicron Cases In India) रूग्णांची संख्या वाढत आहे. महाराष्टातही ओमाक्रॉनचे (Omicron cases in maharashtra) 54 रूग्ण आढळून आले आहेत. त्यामुळे खबरदारी घेण्यात येत आहे. ते म्हणाले की, कोरोनाची तिसरी लाट (Corona third wave) आली तर ती ओमिक्रॉनचीच असेल. मात्र याबाबत घाबरून जाण्यासारखे काही नाही. आगामी नाताळ आणि नववर्षात नागरिकांनी गर्दी न करता कोरोना नियमांचे पालन करावे असे आवाहन त्यांनी नागरिकांना केली आहे.

सध्या रोज साडेसहा लाख लोकांचे (Covid Vaccination) लसीकरण होत असून या गतीने लसीकरण झाल्यास 20 दिवसात लसीकरण पूर्ण होऊ शकेल, अशी माहितीही टोपे यांनी दिली. लस न घेतलेल्या लोकांची गाव निहाय यादी करून प्रत्येक व्यक्तीला मॅसेज पाठवण्यात येणार असल्याचे मंत्री टोपे यावेळी म्हणाले.