मनसे अध्यक्ष राज ठाकरे (Raj Thackeray) यांनी भोंग्यावरुन घेतलेल्या भूमिकेमुळं राज्यातील राजकीय वातावरण चांगलंच तापलंय. राज ठाकरे यांनी पुण्यातून पुन्हा एकदा 3 मेपर्यंतच्या अल्टिमेटमचा पुनरुच्चार केलाय. त्यानंतर राजकीय पडसाद उमटताना दिसत असून गृहमंत्री दिलीप वळसे पाटील (Dilip Walse Patil) यांनीही याची दखल घेतलीय. दिलीप वळसे पाटील यांनी यानंतर पोलीस आयुक्त आणि पोलीस महासंचालकांना महत्वाचे आदेश दिलेत, असं त्यांनी माध्यमांशी बोलताना सांगितलं.

राज्याच्या पोलिस (Police) महासंचालकांना आढावा बैठक घ्यायला सांगितलीय. येत्या काही दिवसांत राज्यात उद्भवू शकणाऱ्या परिस्थितीत काय अंमलबजावणी करता येईल, त्या दृष्टीनं तयारी करण्याच्या सूचनाही दिल्या आहेत. कायदा आणि सुव्यवस्था टिकविण्याची जबाबदारी आमच्यावर आहे. गेल्या काही दिवसांपासून राज्यात कायदा आणि सुव्यवस्था बिघडविण्याचा प्रयत्न सुरूय. आम्ही हा प्रकार अतिशय गंभीरतेनं घेतलाय. कोणीही कायदा हातात घेण्याचा प्रयत्न करू नये. शिवाय, तेढही निर्माण करू नये. त्याचबरोबर अशा प्रकारची कृती झाली, तर कठोर कारवाई केली जाईल, असा स्पष्ट इशाराही गृहमंत्री दिलीप वळसे पाटील यांनी दिलाय.

वळसे पाटील पुढं म्हणाले, सर्वोच्च न्यायालयानं २००५ ला निकाल दिला होता. २०१५ साली राज्य सरकारनं काही जीआर (GR) काढले आहेत. त्या जीआरमध्ये लाउडस्पीकरच्या परवानगीसंदर्भातील पद्धत ठरवून दिलीय. त्याची अंमलबजावणी करण्यासंदर्भातील सूचना देण्यात येतील. याबाबत अंतिम निर्माण घेण्यापूर्वी राज्यातील सर्व प्रमुख विरोधी पक्षांच्या नेत्यांची बैठकही बोलावून चर्चा करणार आहे. त्यानंतर अंतिम निर्णय घेतला जाईल, असं त्यांनी स्पष्ट केलं.