म्हसवड (सातारा) : केंद्राच्या माध्यमातून सिमेंट रस्ते, जिहे-कठापूर योजनेअंतर्गत उत्तर भागातील गावांना पाणी, म्हसवडमधील केंद्रीय एमआयडीसी इत्यादी माण तालुक्यातील सर्वांगीण विकास कामं मीच पाठपुरावा करुन मंजूर करुन घेतली. मात्र, म्हसवड एमआयडीसीबाबत (Mhaswad MIDC) उपमुख्यमंत्री अजित पवार (Ajit Pawar) यांनी खोडा घातल्याचा आरोप राष्ट्रीय समाज पक्षाचे नेते व माजी मंत्री महादेव जानकर (Mahadev Jankar) यांनी केलाय.

माजी मंत्री जानकर सातारा जिल्ह्यातील म्हसवडमधील पत्रकार परिषदेत बोलत होते. आगामी काळात देशाचा पंतप्रधान मीच होणार आहे, असा दावा करत जानकर पुढं म्हणाले, येणाऱ्या काळात जिल्हा परिषद, पंचायत समितीसह म्हसवड पालिकांच्या निवडणुका रासप (Rashtriya Samaj Paksha) स्वबळावर लढविणार असल्याचंही त्यांनी यावेळी स्पष्ट केलं.

फडणवीस साहेब, तुम्ही मुख्यमंत्री झाला असता का?

राज्याचे विरोधी पक्षनेते तथा माजी मुख्यमंत्री देवेंद्र फडवणीस (Devendra Fadnavis) म्हणतात की, आम्हाला (राष्ट्रीय समाज पक्षाला, RSP) मंत्रिपद दिलं.’ म्हणजे आमच्यावर मेहरबानी केली नाही. आम्ही युतीत होतो; म्हणून तुम्ही मुख्यमंत्री झाला. आम्ही युती सोबत नसतो, तर फडणवीस साहेब, तुम्ही मुख्यमंत्री झाला असता का?, असा सवाल महादेव जानकर यांनी केलाय. देशातील दोन महत्वाचे पक्ष असलेल्या भाजप आणि काँग्रेसचं धोरण हे सारखेच आहे. ‘फोडा-झोडा आणि राज्य करा, छोट्या पक्षाशी दोस्ती करा, सत्ता मिळवा, वापर करा आणि त्यांना सोडून द्या,’ हेच धोरण दोन्ही पक्षांनी राबविलंय, असा टोलाही त्यांनी लगावला.