नाशिक - 45 वर्षांपूर्वी इलेक्‍ट्रॉनिक पद्धतीने एका संगणकाहून दुसऱ्या संगणकावर संदेश पाठविण्याची ऐतिहासिक घटनेची नोंद झाली होती. इंटरनेटची सुरवात झाल्यापासून काही वर्षांतच इंटरनेटचा वापर मोठ्या प्रमाणात वाढला आहे. आज इंटरनेट दिन साजरा करताना इंटरनेटचा केवळ वापर करावा, त्याच्या आहारी जाऊ नये, असा सल्ला तज्ज्ञांनी दिला.

इंटरनेटमुळे अनेक सुविधा एका क्‍लिकवर उपलब्ध झाल्या आहेत. सकाळी उठल्यावर दात घासण्यापूर्वी मोबाईल इंटरनेट सुरू करून सोशल मीडियावरील मेसेज पाहण्याची सवयदेखील अनेकांसाठी नित्याची झाली आहे. व्यसन जडावे, या पद्धतीने इंटरनेटवर कधी सोशल मीडिया, तर कधी यू-ट्यूब किंवा अन्य गेमिंग ऍप्समध्ये दिवसातील बहुतांश वेळ घालविताना नात्यातील विसंवाद वाढत चालला आहे. इंटरनेटच्या अतिवापरामुळे व्यायामाच्या अभावातून शारीरिक व्याधी उद्‌भवत असून, झोपेवरील परिणाम व अन्य घटकांमुळे मानसिक आजारांना आमंत्रण ठरले जात आहे. आजच्या स्थितीत इंटरनेटच्या वापराशिवाय अनेक बाबी अशक्‍य असल्या, तरी मर्यादित वापरातून संभाव्य आजार टाळता येऊ शकतात, असेही तज्ज्ञांचे मत आहे.

डेटा ट्रॅफिकमध्ये वाढ
इंटरनेट वापराविषयी "बीएसएनएल'चे महाव्यवस्थापक नितीन महाजन म्हणाले, की पूर्वीपर्यंत कॉल्सच्या आधारे विविध रिचार्ज, बिले निघत होती. परंतु, आज कॉलिंग पूर्णपणे मोफत झालेली असताना कुठली कंपनी किती जास्त डेटा देते, यावर सर्वस्वी अवलंबून आहे. या डेटा संस्कृतीत संवादालाही मर्यादा आली असून, केवळ मॅसेजिंग ऍप्स्‌द्वारे बोलण्याची सवय आताच्या पिढीला झाली आहे. इंटरनेट वापरातून डेटा ट्रॅफिकमध्ये वर्षागणिक दुपटी-तिपटीने वाढ होत आहे. ही गरज भागविण्यासाठी पुरवठादारांना ऑप्टिकल फायबरचे जाळे आणखी विस्तृत करावे लागत असल्याचे महाजन यांनी नमूद केले.