सातारा : हिंदवी स्वराज्याच्या महाराणी येसूबाई (Maharani Yesubai) तब्बल ३० वर्षांनंतर औरंगजेबाच्या कैदेतून सुटून साताऱ्यात आल्या होत्या. याला आज ३०४ वर्षे पूर्ण झाली.

या घटनेचे स्मरण म्हणून महाराणी येसूबाई यांच्या श्रृंगारपूर येथील माहेरून आणलेल्या मातीचे आज पोवई नाका येथील छत्रपती शिवाजी महाराज यांच्‍या पुतळ्याजवळ पूजन करण्‍यात आले.

महाराणी येसूबाई यांच्या सातारा आगमनाचा हा दिवस यापुढे शौर्यदिन म्हणून पाळणार असल्याची माहिती येसूबाई फाउंडेशनचे संस्थापक सुहास राजेशिर्के यांनी दिली. यावेळी फाउंडेशनचे विश्‍वस्त धनश्री नितीन राजेमहाडिक, स्नेहल सुहास राजेशिर्के, शिल्पा सुरेश राजेशिर्के, सुधा सुभाष राजेशिर्के, जिज्ञासा मंचचे नीलेश पंडित, जयंत देशपांडे, माहुलीचे सरपंच प्रवीण शिंदे, उपसरपंच अविनाश कोळपे आदी उपस्‍थित होते.

स्‍वराज्याचे दुसरे छत्रपती संभाजीराजे भोसले यांच्या पत्नी व स्वराज्याच्या महाराणी येसूबाई यांना संभाजीराजेंच्‍या मृत्यूनंतर कैदेत टाकण्‍यात आले. २९ वर्षे छत्रपती शाहू आणि महाराणी येसूबाई कैदेत होते. यानंतर ता. ४ जुलै १७१० मध्ये महाराणी येसूबाई कैदेतून सुटून साताऱ्यात परतल्या.

याचे स्मरण करण्यासाठी येसूबाई फाउंडेशनने कार्यक्रमाचे आयोजन केले आहे. यासाठी येसूबाई यांचे माहेर असणाऱ्या श्रृंगारपूर येथून माती आणण्‍यात आली होती. या मातीचे पूजन करत येसूबाई यांना अभिवादन करण्‍यात आले. यानंतर माहुली येथील महाराणी येसूबाई यांच्या समाधिस्थळी अभिवादन करण्‍यात आले.

सुहास राजेशिर्के यांनी महाराणी येसूबाई यांनी स्वराज्यासाठी केलेल्‍या त्‍यागाला तोड नाही. या त्‍यागाची नव्‍या पिढीला माहिती व्‍हावी, यासाठी हा दिवस यापुढील काळात शौर्यदिन म्हणून साजरा करणार असल्‍याचे सांगितले. याच अनुषंगाने अनंत इंग्लिश स्कूलमध्‍ये इतिहास संशोधक शिल्पा परब यांचे व्याख्यान आयोजित करण्यात आले होते.