Maharashtra Government Declares Local Holiday: राज्य शासनाकडून एक मोठा निर्णय जाहीर करण्यात आला आहे. त्यानुसार आता दहीहंडी आणि अनंत चतुर्दशी ऐवजी नारळी पौर्णिमा व ज्येष्ठगौरी विसर्जनाच्या दिवशी मुंबई शहरासह उपनगरातील राज्य शासकीय व निमशासकीय कार्यालयांना स्थानिक सुट्टी जाहीर करण्यात आलेली आहे. राज्य सरकारच्या डीजीआयपीआर विभागाकडून याबाबतचे परिपत्रक काढले गेले आहे.

तर नारळीपौर्णिमेमुळे शुक्रवारी ८ ऑगस्ट रोजी सुट्टी जाहीर झाल्याने, मुंबईतील सर्व कला, विज्ञान आणि वाणिज्य शाखेच्या महाविद्यालयीन आणि फार्मसी तसेच डिस्टन्स लर्निंग व ऑनलाइनच्या शुक्रवार ८ ऑगस्ट रोजी होणाऱ्या परीक्षा पुढे ढकलण्यात आल्या आहेत.

तसेच परीक्षांची पुढील तारीख जाहीर केली जाईल, अशी माहिती मुंबई विद्यापीठाकडून काढण्यात आलेल्या परिपत्रकाद्वारे सर्व महाविद्यालयांना देण्यात आली आहे.

राज्य सरकारने यंदा गोपालकाला आणि गणपती विसर्जन या दोन्ही दिवशी राज्य शासकीय आणि निमशासकीय कार्यालयांना सुट्टी दिलेली नाही. त्याबाबतचे परिपत्रक सामान्य प्रशासन विभागाने प्रसिद्ध केले आहे. सध्या हे आदेश केवळ मुंबई शहर आणि मुंबई उपनगर या दोन्ही जिल्ह्यासांठी लागू करण्यात आले आहेत. त्यामुळे यावर आता काय प्रतिक्रिया उमटतील हे पाहणे औत्सुक्याचे ठरणार आहे.

तर सामान्य प्रशासन विभागाने काढलेल्या शासन निर्णयानुसार, सन २०२५ या वर्षातील गोपाळकाला (दहीहंडी) (दिनांक १६ ऑगस्ट, २०२५) व अनंत चतुर्दशी (दिनांक ६ सप्टेंबर, २०२५) या ऐवजी नारळी पौर्णिमा (दिनांक ८ ऑगस्ट, २०२५) व ज्येष्ठगौरी विसर्जन (दिनांक २ सप्टेंबर, २०२५) निमित्ताने स्थानिक सुट्टी मुंबई शहर व मुंबई उपनगर जिल्ह्यातील राज्य शासकीय / निमशासकीय कार्यालयांना जाहीर करण्यात आली आहे.

तसेच हे आदेश मुंबई शहर व मुंबई उपनगर जिल्ह्यातील राज्य शासकीय/ निमशासकीय कार्यालयांना लागू राहणार आहेत. वरील स्थानिक सुट्टी शासन निर्णय क्रमांक पी अॅन्ड एस. नंबर पी-१३/II/बी, दिनांक ५ नोव्हेंबर, १९५८ मधील तरतूदीनुसार जाहीर करण्यात येत असल्याचे सामान्य प्रशासन विभागाने कळवले आहे.