शिंदे गटात सामील होणाऱ्या शिवसेनेच्या नेत्यांमध्ये आता माजी आमदार तथा शिवसेनेचे उपनेते अर्जुन खोतकर यांची भर पडली असल्याची चर्चा आहे. दरम्यान, अर्जून खोतकर शिंदे गटात ३१ जुलैला प्रवेश करणार असल्याचे सांगण्यात येत आहे. (maharashtra politics crisis arjun khotkar joins shinde)

दरम्यान, तत्कालीन ठाकरे सरकरमधील मंत्री अब्दुल सत्तार यांच्यासोबत खोतकर यांनी खासदार श्रीकांत शिंदे यांची भेट घेतली. यावेळी त्यांनी शिंदे गटातील प्रवेशाबाबत उद्या म्हणजेच ३० जुलैला निर्णय जाहीर करणार असल्याचे सांगितले.

चार दिवसांपूर्वी खोतकर दिल्लीत असतांना मुख्यमंत्री एकनाथ शिंदे यांना भेटल्याच्या बातम्या समोर आल्या होत्या. त्यांनतर अखेर खोतकर यांनी उद्धव ठाकरेंची साथ सोडत शिंदे गटात सामील होण्याचा निर्णय घेतला असल्याचे बोलले जात आहे. खोतकर हे मराठवाड्यातील शिवसेनेचे महत्वाचे नेते समजले जातात. त्यामुळे त्यांनी जर बंडखोरी केली तर शिवसेनेला मोठा फटका बसण्याची शक्यता आहे. तर खोतकर आणि एकनाथ शिंदे यांच्या भेटीचे काही फोटो सुद्धा समोर आले आहेत.

मात्र, अद्याप खोतकरांनी यासंदर्भात अधिकृत माहिती दिलेली नाही.

अशातच सत्तार यांचे नाव नव्या मंत्रींडळाच्या यादीतून वगळल्याची चर्चा सुरू झाली आहे. सत्तार हे शिंदे गटाचे आमदार आहेत. त्यामुळे सत्तार यांना मंत्रीपद मिळणार की नाही, यावर तर्कवितर्क लावले जात आहे. मात्र मंत्रीमंडळाच्या यादीतून नाव वगळल्याची कुणकुण सत्तार यांना लागल्यामुळेच ते दिल्लीत दाखल झाल्याची चर्चा सुरू आहे.