फलटण शहर/दहिवडी : न भूतो न भविष्यती सभा घेतलेल्या मनोज जरांगे-पाटील (Manoj Jarange-Patil) यांची तोफ शुक्रवारी (ता. २०) फलटण आणि दहिवडीमध्ये धडाडणार आहे. फलटण येथे सायंकाळी साडेसात वाजता, तर ती सभा आटोपल्‍यानंतर दहिवडी येथे रात्री त्‍यांची जाहीर सभा होणार आहे, अशी माहिती मराठा क्रांती मोर्चा फलटणच्या (Maratha Kranti Morcha) समन्‍वकांनी दिली आहे.

मनोज जरांगे- पाटील यांच्या हाकेला ओ देऊन संपूर्ण मराठा समाज अंतरवाली सराटीत एकवटला होता. या सभेत त्यांनी सरकारला आरक्षणाबाबत इशारा देऊन दहा दिवसांची मुदत दिली होती. त्यानंतर त्यांनी आपल्या महाराष्ट्रातील दौऱ्याला सुरुवात केली.

सातारा जिल्ह्यात मनोज जरांगे- पाटील येणार हे निश्चित होते; पण सभेचे ठिकाण अंतिम होत नव्हते. मात्र, अंतिम क्षणी माणकरांनी त्यांच्या सभेचा मान पटकावला. मराठा समाजातील सर्वसामान्य तरुणांनी तालुक्यातील मराठा समाजाच्या गावांना सोबत घेऊन सुरू केलेल्या ठिय्या आंदोलनाची दखल घेऊन माणमध्ये सभेसाठी येण्याचा निर्णय घेतला. महाराष्ट्राचे कुलदैवत असलेल्या शिखर शिंगणापूर येथील शंभू महादेवाचे दर्शन घेऊन ते दहिवडीत येणार आहेत.

फलटणनंतर माणमध्ये होणारी सभा ही मनोज जरांगे- पाटील यांची या दौऱ्यातील शेवटची सभा असेल. त्यानंतर ते गावी जाऊन २४ ऑक्टोबरपासूनच्या संभाव्य बेमुदत उपोषणाची तयारी करणार आहेत. त्यामुळे फलटण आणि माणमध्ये ते काय बोलणार? याकडे सर्वांचे लक्ष लागले आहे.