ठाण्यात शिंदे गटाच्या महिल्या कार्यकर्त्यांनी ठाकरे गटाच्या एका महिला कार्यकर्त्याला मारहाण केल्याची घटना समोर आली आहे. त्यानंतर राज्यात नव्या वादाला तोंड फुटले. दरम्यान, शिंदे गटाने म्हणजेच शिवसेनेने पत्रकार परिषद घेत या सर्व घटनेवर स्पष्टीकरणं दिलं. अशातच, यावेळी मुख्यमंत्री एकनाथ शिंदे यांना डॉक्टरेट पदवी मिळाल्याचा मुद्दा उपस्थित झाला. (Meenakshi Shinde on CM Eknath Shinde Get Doctorate Degree maharashtra politics )

नुकतंच, नवी मुंबईच्या डी. वाय. पाटील इन्स्टिट्यूटकडून मुख्यमंत्री एकनाथ शिंदे यांना डॉक्टरेट ही पदवी प्रदान करण्यात आली आहे. सामाजिक, वैद्यकीय आणि आपत्कालीन व्यवस्थापनातील त्यांचं उल्लेखनीय कार्य लक्षात घेऊन त्यांना डी. वाय. पाटील विद्यापीठाने डॉक्टरेट पदवीने सन्मानित केले आहे. त्यानंतर राज्यात विरोधकांडून मुख्यमंत्री शिंदेंवर टीकेचा भडीमार सुरु आहे.

दरम्यान, आज शिवसेनेच्या पदाधिकारी मिनाक्षी शिंदे यांनी हाच मुद्दा पकडत विरोधाकांवर निशाणा साधला. डॉक्टरेट मिळाली म्हणून त्यांच्या पोटात दुखतंय. अशा शब्दात शिंदे यांनी निशाणा साधला.

डी.वाय. पाटील अभिमत विद्यापीठाच्या १७ व्या दीक्षांत समारंभा नेरुळच्या डी वाय पाटील स्टेडियमवर पार पडला. राज्यपाल रमेश बैस यांच्यासह मुख्यमंत्री एकनाथ शिंदे या सोहळ्याला उपस्थित होते. विद्यापीठाचे कुलगुरू तथा अध्यक्ष डॉ. विजय पाटील आणि राज्यपाल रमेश बैस यांच्या हस्ते मुख्यमंत्री एकनाथ शिंदे यांना डॉक्टरेट पदवीने सन्मानित करण्यात आले.