सातारा : शिवसेना पक्षात काम करताना अनेकदा आमच्यावर गुन्हे दाखल झाले. गेल्या 35 वर्षांहून अधिक काळ संघर्ष करुन शिवसेना वाढवण्याचा आम्ही प्रयत्न केला. मात्र, आता मातोश्रीवरील चार डाकू उध्दव ठाकरेंना (Uddhav Thackeray) चुकीचं मार्गदर्शन करताहेत, असा गौप्यस्फोट गुलाबराव पाटील यांनी केला.

चुकीच्या मार्गदर्शनामुळंच शिवसेनेची वाताहत झाली आहे. उध्दव ठाकरेंनी जुन्या कडीला उत आणण्याचं थांबवून राज्याच्या विकासावर बोलावं, अशी टीका राज्याचे पाणी पुरवठा मंत्री गुलाबराव पाटील (Gulabrao Patil) यांनी साताऱ्यात पत्रकार परिषदेत केली.

जिल्हा परिषदेच्या यशवंतराव चव्हाण बहुउद्देशीय सभागृहात पाणीपुरवठा व स्वच्छता विभाग, जिल्हा परिषद, जलजीवन मिशन अंतर्गत जिल्हास्तरीय कार्यशाळा व पाणी पुरवठा योजनांचं ई-भूमिपूजनानंतर पाटील यांनी पत्रकारांशी संवाद साधला. शिवसेनेचे नेते खासदार संजय राऊत (Sanjay Raut) यांनी मुख्यमंत्री व शिंदे गटाच्या आमदारांवर केलेल्या टीकेबाबत पाटील यांनी ठाकरे गटावर जोरदार टीका केली.

संजय राऊत हे साधे नगरसेवक म्हणूनही निवडून आलेले नाहीत. शिवसेनाप्रमुख व शिवसेनेच्या आमदारांच्या जीवावर आत्तापर्यंत त्यांना थेट संधी मिळाली आहे. शिवसेना पक्ष हा संघर्षातून उभा राहिला होता. मात्र, संजय राऊतांसारख्या माणसांमुळं या पक्षाचं मोठं नुकसान झालं आहे, असंही पाटील म्हणाले.

उध्दव ठाकरेंनी मुख्यमंत्र्यांवर व शिंदे गटाच्या आमदारांवर टीका करण्यात वेळ घालवू नये. याचबरोबर कोणत्याही पक्षाच्या नेत्यांवर हल्ला होणे चुकीचे असून आदित्य ठाकरे यांच्यावरील हल्ल्याची चौकशी पोलीस यंत्रणेमार्फत होईल, असंही त्यांनी यावेळी स्पष्ट केलं.