शिवसेना आमदार अपात्रता प्रकरणात महाराष्ट्र विधानसभा अध्यक्ष राहुल नार्वेकर यांनी निकाल दिला. त्यानंतर आता राहुल नार्वेकर यांच्यासमोर राष्ट्रवादी काँग्रेसच्या आमदार अपात्रता प्रकरण प्रलंबित आहे. राष्ट्रवादी काँग्रेसमध्येही मागच्यावर्षी फूट पडली. त्यानंतर पक्षात अजित पवार गट आणि शरद पवार गट निर्माण झाले.

शरद पवार गट विरोधी बाकांवर बसतो, तर अजित पवार गट सत्तेत सहभागी झाला. राष्ट्रवादी काँग्रेसच्या आमदार अपात्रता प्रकरणाची सुनावणी सुरु आहे. आज या सुनावणीवेळी जयंत पाटील यांच्या प्रदेशाध्यक्ष पदावरील निवडीवर प्रश्नचिन्ह उपस्थित करण्यात आलं आहे. (NCP Mla Disqualification case)

अजित पवार गटाच्या वकिलांकडून जयंत पाटील यांच्या प्रदेशाध्यक्ष पदावरील निवडीवर प्रश्न चिन्ह उपस्थित करण्यात आलं आहे. पक्षाच्या प्रदेशाध्यक्ष पदावर जयंत पाटील यांची निवड ३ वर्षांसाठी केली जाते. २०२२ सालीच जयंत पाटील यांचा प्रदेशाध्यक्ष कार्यकाळ संपला होता, असा मुद्दा अजित पवार गटाच्या वकिलांकडून उपस्थित करण्यात आला आहे.

त्यावर जयंत पाटील यांनी स्पष्टीकरण दिलं आहे. सुमारे ३ वर्षांसाठी निवड असल्याने कार्यकाळ संपत नाही. तर पुढील निवडीपर्यंत किंवा निवडणूक होईपर्यंत कार्यकाळ सुरु राहतो, असं स्पष्टीकरण जयंत पाटील यांनी सुनावणीवेळी दिलं आहे.