मुंबई - राज्यात सुपर मार्केटमध्ये वाईन विक्रीला राज्य सरकारने परवानगी देण्याचा निर्णय घेतल्यानंतर विरोधकांनी महाविकास आघाडीच्या (Maha Vikas Aghadi) नेत्यांवर जोरदार टीकास्र सोडलं आहे. भाजप नेते किरिट सोमय्या (Kirit Somaiya) यांनी शिवसेना खासदार संजय राऊत(Sanjay Raut) यांच्या मुलींचे वाईन उद्योगाशी कनेक्शन असल्याचा आरोपही केला. आता यात भाजप नेते मोहित कंबोज (Mohit Kamboj) यांनी संजय राऊत यांच्यासह राष्ट्रवादी काँग्रेसचे नेते नवाब मलिक (Nawab Malik) यांना डिवचलं आहे.

मोहित कंबोज यांनी एक व्हिडिओ शेअर करून राज्यात सलिम जावेदची जुगलबंदी सुरु आहे आणि यात सलिम नवाब मलिक तर जावेद संजय राऊत असल्याचं म्हटलं आहे. नवाब मलिक आणि समीर वानखेडे यांच्यात आरोप प्रत्यारोपावरून कंबोज यांनी टीका केली. नुकतंच समीर वानखेडे यांच्या बारचे लायसन्स रद्द करण्याची कारवाई झाली. यातही संजय राऊत यांचे कनेक्शन असल्याचं कंबोज यांनी म्हटलं आहे.

समीर वानखेडे यांच्या बारचे लायसन्स ज्या जिल्हाधिकाऱ्यांनी रद्द केले ते संजय राऊत यांच्या मुलीचे सासरे आहेत.एकीकडे नवाब मलिक यांना कोर्ट फटकारत आहेत तर दुसरीकडे सलिम आणि जावेद आपले पर्सनल स्कोअर सेटल करत आहेत असंही कंबोज यांनी म्हटलं.

राज्यात सत्तेचा आणि पदाचा दुरुपयोग स्वतःची पर्सनली दुष्मनी काढण्यासाठी होतोय का?अधिकाऱ्यांसोबत असलेली नाती ही स्वतःची सेटलमेंट आणि पर्सनल स्कोअर वाढवण्यासाठी होतोय का? माझा आता राज्यातील जनतेला सवाल आहे की, चोरी करून आलेले हे सरकार ज्या पद्धतीने चालले आहे आणि पदाचा गैरवापर करत आहेत तसं योग्य आहे का? अशी टीका मोहित कंबोज यांनी केली आहे.