मुंबई- महाराष्ट्र लोकसेवा आयोगाने (MPSC) महत्वाचा निर्णय घेतला आहे. इथून पुढे आयोगाने पूर्व परीक्षेचा फॉर्म भरताना उमेदवारांना कागदपत्रे किंवा प्रमाणपत्रे अपलोड करणे अनिवार्य केले आहे. यापूर्वी कागदपत्रे अपलोड करणे ऐच्छिक होते. बोगस प्रमाणपत्र धारकांना आळा घालण्यासाठी हा निर्णय घेण्यात आल्याचं आयोगाकडून सांगण्यात आलं आहे. त्यामुळे आयोगाच्या या निर्णयावर महाराष्ट्र लोकसेवा आयागाची परीक्षा देणारे विद्यार्थी कसा प्रतिसाद देतात हे पाहावं लागणार आहे. (Maharashtra MPSC Latest News)

आयोगाने म्हटलंय की, इथून पुढे आयोगाच्या वतीने ज्या पदांसाठी जाहिराती प्रसिद्ध केल्या जाणार आहेत, त्या पूर्व परीक्षेचा फॉर्म भरताना उमेदवारांना कागदपत्रे किंवा प्रमाणपत्रे अपलोड करणे हे अनिवार्य करण्यात आले आहे. बोगस प्रमाणपत्र धारकांना आळा घालण्यासाठी हा निर्णय आहे. उमेदवार जाहिरातीनुसार पात्र ठरत असल्यास अर्ज करताना कागदपत्रे किंवा प्रमाणपत्रे (लागू असलेली) अपलोड करावी लागतील. पात्रते संदर्भातील विविध दाव्यांचा अनुषंगाने प्रमाणपत्रे किंवा कागदपत्रे अपलोड केल्याशिवाय अर्ज सादर करता येणार नाही.

राज्य शासनाच्या 46 विभागांमध्ये अडीच लाखांपर्यंत पदे रिक्‍त आहेत. कोरोनामुळे मागील दोन वर्षांत महाराष्ट्र लोकसेवा आयोगाच्या माध्यमातून नवी पदभरती झालेली नाही. या पार्श्‍वभूमीवर आता राज्य सरकारच्या गृह, कृषी, महसूल, शिक्षण यासह अन्य महत्त्वाच्या विभागांमधील 17 हजारांहून अधिक पदे आयोगाच्या माध्यमातून भरली जाणार आहेत. जून 2018 पासून आयोगातील सदस्यांची पदे रिक्‍त असल्याने उमेदवारांची परीक्षा घेणे तथा परीक्षांचे नियोजन करणे, त्यांच्या मुलाखती घेण्यासाठी अडचणींचा सामना करावा लागत आहे. या पार्श्‍वभूमीवर उपमुख्यमंत्री अजित पवार यांनी आयोगातील पदे 31 जुलैपर्यंत भरली जातील, असे विधानसभेच्या अधिवेशनात स्पष्ट केले होते.