मागील काही दिवसांपासून राज्यात सत्ताधारी आणि विरोधक यांच्यात राजकीय वाद सुरु आहेत. एकमेकांचे घोटाळे उघड करण्यावरून शाब्दिक युद्धांचे रणांगण तापले आहे. दरम्यान, आज नारायण राणे (Narayan Rane) यांनी पत्रकार परिषद घेत पुन्हा एकदा ठाकरे सरकार, मुख्यमंत्री (Uddhav Thackeray) आणि खासदार राऊतांवर निशाणा साधला आहे. आज ते मुंबईत बोलत होते.

ते म्हणाले, आम्ही अजून कुणाचे काहीही घोटाळे बाहेर काढलेले नाहीत. मात्र तुम्ही कसली दुष्मनी घेता आहात? तुम्ही कितीही दुष्मणी घेतली तर मी शरण येणारा नाही. कारण मी मराठा आहे. आम्हाला राजकारण कुणीही शिकवू नये. कुणाच्या पोटावर मारून आम्ही राजकारण करत नाही. विकासावर चिपाट खासदार राऊत (Sanjay Raut) बोलत नाहीत हे कितपत योग्य आहे? नाव न घेता राणेंनी राऊतांवर हल्लाबोल केला आहे.

यावेळी सुशांत सिंग रजपुत या प्रकरणावर ते म्हणाले, दिशा सालियनचा पोस्टमार्टेम रिपोर्ट का नाही आला ? सीसी टीव्हीचे कॅमेरे कसे गायब झाले, ठराविक व्यक्तीची रुग्णवाहिका कशी आली, हॉस्पिटलला कुणी नेलं, सगळे पुरावे कुणी नष्ट केले, त्यात अधिकारी कोण होते हेसुद्धा माहिती आहे. सुशांतसिंह हा दिशा सालियनच्या हत्येचा पर्दाफाश करणार होता म्हणून त्याची हत्या करण्यात आल्याचा खळबळजनक आरोप केंद्रीय मंत्री नारायण राणे यांनी केला.