मुंबई : शरद पवारांनी उद्धव ठाकरेंवर जादूटोणा केला असं वादग्रस्त विधान भाजपचे प्रदेशाध्यक्ष चंद्रशेखर बावनकुळे यांनी केलं आहे. या आक्षेपार्ह टीकेवर आता राष्ट्रवादी काँग्रेस आणि शिवसेनेकडून बावनकुळेंना उत्तर देण्यात आलं आहे. शिवसेना नेते भास्कर जाधव आणि संजय राऊत यांनी त्यांना सुनावलं आहे. (NCP Shiv Sena reply to Chandrashekhar Bawankule who called Pawar Bhondubaba)

भास्कर जाधव म्हणाले, भाजपचे नेते एका बाजूला साधनसुचितेचा आणि खूप मोठ्या संमजसतेचा आव आणतात की, आपण राजकारणातील कटुता संपवली पाहिजे, द्वेष संपवला पाहिजे. भाजपच्या प्रदेशाध्यक्षांनी जर शरद पवारांबद्दल असं वक्तव्य केलं असेल तर भाजपचा फॉर्म्युला असा आहे की दाखवायचे दात वेगळे आणि खायचे दात वेगळे. एकाबाजूला कटुता संपवूया द्वेष संपवूया असं सांगायचं आणि दुसऱ्या बाजूला द्वेषमूलक वक्तव्य करायची ही भाजपची जुनी खोडचं आहे.

संजय राऊत म्हणाले, "शरद पवार आणि उद्धव ठाकरे यांच्यासंदर्भात वादग्रस्त विधान करुन लक्ष आकर्षित करण्याची गरज जर भाजपला पडत असेल तर त्यांनी हे थांबवायला हवं. त्यांच्यावर चिखलफेक करणाऱ्यांनी हे लक्षात घ्यावं की आपलं कर्तृत्व काय आहे हे पाहावं. अशी विधानं आम्ही करत नाही तुम्ही करु नये"

रोहित पवारांची टीका

दरम्यान, अंधश्रद्धा आणि जादुटोणाविरोधी कायदा ज्यांच्यामुळं संमत झाला त्या डॉ. नरेंद्र दाभोलकरांच्या साताऱ्यात प्रदेशाध्यक्ष बावनकुळेंनी जादूटोण्याची भाषा करणं पुरोगामी महाराष्ट्राला काळीमा फासणारी आहे. महाराष्ट्राचा तसेच या कायद्याचा अपमान करणारी आहे, अशी प्रतिक्रिया राष्ट्रवादी काँग्रेसचे आमदार रोहित पवार यांनी केला आहे.

काय म्हणाले होते बावनकुळे?

शरद पवारांनी उद्धव ठाकरेंवर जादूटोणा केला तसेच शरद पवारांच्या ताब्यात एकदा कोणी आलं की त्याची सुटका होत नाही, असंही बावनकुळे म्हणाले आहेत. राष्ट्रवादी काँग्रेसने आता सत्तेत यायची स्वप्नं पाहू नयेत, असा टोलाही बावनकुळे यांनी लगावला होता.