कोल्हापूर : शिवसैनिक संतोष परब (Santosh Parab) हल्लाप्रकरणी न्यायालयीन कोठडीत असलेल्या आमदार नितेश राणे (Nitesh Rane) यांना अधिक तपासासाठी कोल्हापूरला नेण्यात येत असताना त्यांच्या छातीत दुखू लागल्यानं त्यांना घेऊन जाणारी रुग्णवाहिका रस्त्यातच थांबवून डॉक्टरांनी त्यांच्यावर उपचार केले. दरम्यान, राणे यांची कोल्हापुरातील छत्रपती प्रमिलाराजे रुग्णालयात (CPR) उपचार करण्यात येणार आहेत. भाजपच्या कार्यकर्त्यांनी ही माहिती दिली आहे. (Nitesh Rane chest pain again treatment done by stopping ambulance on road)

पोलिसांनी नितेश यांची कोठडी वाढवून देण्याची मागणी केल्यामुळे न्यायालयानं १८ फेब्रुवारीपर्यंत त्यांना न्यायालयीन कोठडी दिली आहे. यानंतर झालेल्या वैद्यकीय तपासणीत त्यांची प्रकृती ठीक नसल्याचं समोर आल्यानं त्यांना सिंधुदुर्ग जिल्हा रुग्णालयात दाखल करण्यात आलं होतं. दरम्यान, नितेश राणे यांची (ता. ५) शनिवारी कोल्हापुरात छत्रपती प्रमिला राजे शासकीय रुग्णालय (सीपीआर) मध्ये वैद्यकीय तपासणी होणार होती. पण त्यांना सिंधुदुर्ग रुग्णालयातच उपचार करण्यात आले. त्यानंतर आज (सोमवार) त्यांना रुग्णालयातून कोल्हापुरात नेत असताना पुन्हा छातीत दुखू लागलं. यावेळी त्यांचा ताफा रस्त्यातच थांबवून डॉक्टरांनी उपचार केले त्यानंतर हा ताफा पुढे कोल्हापूरला रवाना झाला. यानंतर त्यांच्यावर सीपीआरमध्ये उपचार होणार आहेत.

नितेश राणे आहेत या आजारांनी ग्रस्त

नितेश राणे यांना किडनी स्टोन, ब्लड प्रेशरचा त्रास आहे. त्यातच त्यांची शुगर कमी झाल्यानं त्यांच्यावर जिल्हा रुग्णालयात उपचार करून सुद्धा त्यांच्या प्रकृतीत सुधारणा होत नव्हती. त्यामुळं शासकीय रुग्णालय असलेल्या कोल्हापूर सीपीआर रुग्णालयात हलविण्याचा निर्णय घेण्यात आला होता. तिथे चेकअप केल्यावर पुढील निर्णय घेण्यात येईल, अशी माहिती अतिरिक्त जिल्हा शल्यचिकित्सक डॉ. अपर्णा गांवकर यांनी दिली.

शिवसैनिक संतोष परब हल्ला प्रकरणी राणे २ फेब्रुवारी रोजी कणकवली न्यायालयात शरण आले होते. यावेळी न्यायालयाने त्यांना ४ फेब्रुवारीपर्यंत पोलीस कोठडी सुनावली होती. काल कोठडी संपल्यानंतर पुन्हा कणकवली न्यायालयात हजर केले असता राणेंना १४ दिवसांची न्यायालयीन कोठडी सुनावण्यात आली होती.