नवी दिल्ली - मुंबईत याच महिन्याच्या अखेरीस विरोधकांच्या इंडिया आघाडीची बैठक आयोजित करण्यात आली आहे. या बैठकीसाठी राष्ट्रवादी काँग्रेसचा शरद पवार गट, शिवसेना आणि महाराष्ट्र काँग्रेसने तयारी केली आहे. त्यातच आज काँग्रेसनेते आणि माजी मुख्यमंत्री अशोक चव्हाण यांनी प्रकाश आंबेडकर यांच्या आघाडीत सामील होण्याबाबत विधान केलं आहे.

अशोक चव्हाण म्हणाले की, माझं प्रकाश आंबेडकर यांच्याशी संभाषण होतं. त्यामुळे प्रकाश आंबेडकर इंडियामध्ये आले तर चांगलच आहे. हा विषय राष्ट्रीय पातळीवरील आहे.

त्यावर मी बोलू शकत नाही. मात्र त्यांनी जर अनुमची दर्शवली तर पुढे निर्णय होऊ शकतो. प्रकाश आंबेडकर इंडिया आघाडीत सामील झाले तर आनंदच आहे, असंही चव्हाण यांनी म्हटलं.

मराठा आरक्षणावर चव्हाण म्हणाले की, मागच्या मंत्रिमंडळात अजित पवार उपमुख्यमंत्री होते, मी देखील मंत्रिमंडळात होतो. मराठा आरक्षणाबाबत आता मुंबईत बैठक घेऊन उपयोग नाही. अजित पवारांना देखील कायदा कळतो, आता केंद्राने निर्णय घ्यायला पाहिजे. केंद्र सरकारने त्यावेळी राज्याचे हातपाय बांधून टाकले होते.

एकनाथ शिंदे आणि आमची भूमिका होती, ओबीसी आरक्षणाला धक्का न लावता मराठा समाजाला आरक्षण दिलं पाहिजे, असं सांगतानाच फडणवीस सरकारच्या काळात आरक्षणाचा जो निर्णय झाला तो केवळ नागरिकांची दिशाभूल करणारा होता, असंही चव्हाण यांनी नमूद केलं.

1 तारखेला इंडियाची बैठक मुंबईत आहे. देशाला दिशा देण्यासाठी इंडिया आघाडी तयार आहे. प्रत्येक राज्यात वेगवेगळी परिस्थिती आहे. मात्र आम्ही सगळे एकत्र येऊन नवा पर्याय देऊ. नागरिकांना देखील ही आघाडी आवडत असल्याचा दावा चव्हाण यांनी केला.