मिरज : मध्य रेल्वेच्या पुणे विभागाकडून (Central Railway Pune Division) सिकंदराबाद-कोल्हापूर ही उन्हाळी स्पेशल साप्ताहिक गाडी सुरू करण्यासाठी रेल्वे बोर्डाकडे प्रस्ताव पाठवला आहे. मात्र गाडीस पंढरपूर, सोलापूर, गाणगापूर, अक्कलकोट या तीर्थक्षेत्रांना थांबा न देत ठेगा दाखविण्यात आला आहे.

‘मध्य रेल्वे’च्या पुणे विभागाने रेल्वे बोर्डाला पाठविलेल्या प्रस्तावात कोल्हापूर, मिरज, कुर्डुवाडी, कलबुर्गी, वाडी आणि सिकंदराबाद स्थानकावर थांबा देण्यात आल्याचा उल्लेख आहे. हे थांबे मोटरमन आणि सुरक्षारक्षक बदलण्यासाठीच आहेत. सिकंदराबाद गाडीचा फायदा सांगली, कोल्हापूर येथून दक्षिण भारतात जाणाऱ्या प्रवाशांना होणार आहे.

मात्र पंढरपूर, सोलापूर, अक्कलकोट आणि गाणगापूर या प्रमुख तीर्थक्षेत्रांना गाडी थांबणार नसल्यामुळे तिला म्हणावा तितका प्रतिसाद मिळण्याची शक्यता कमी असल्याचे प्रवासी संघटनांचे मत आहे. कोल्हापूर-सिकंदराबाद एक्स्प्रेस (Kolhapur-Secunderabad Express) ही उन्हाळी विशेष गाडी सुरू करण्यात आली आहे. मात्र, जूनमध्ये शालेय सत्र सुरू झाल्यानंतरच धावणार असल्यामुळे प्रवाशांचा प्रतिसाद मिळणे कठीण आहे.

कोल्हापूर-सिकंदराबाद ऐवजी कोल्हापूर-हैदराबाद गाडी सुरू करण्याची मागणी होत आहे. सिकंदराबाद गाडी मुळात एप्रिल, मे मध्ये सुरू करणे अपेक्षित होते. जूनमध्ये गाडी सुरू करण्याचा प्रस्ताव पुणे विभागाने रेल्वे बोर्डाकडे पाठवला असला तरी कोल्हापूर-सिकंदराबाद वगळता मुख्य चार स्थानकांवर गाडीस थांबे देण्यात आले आहेत.

२४ बोगींची गाडी जूनमध्ये चार फेऱ्यांमध्ये कोल्हापूर-सिकंदराबाददरम्यान धावणार आहे. याचा प्रस्ताव रेल्वे बोर्डाकडे पाठविण्यात आला आहे. मात्र प्रस्तावित थांब्यांची संख्या कमी असल्यामुळे प्रतिसादही कमी मिळणार असल्याचे मत रेल्वे प्रवासी संघटनांनी व्यक्त केले आहे. प्रवाशांच्या सोयीचा विचार करावा, अशी प्रवासी संघाची मागणी आहे.