Pune Bypoll Election News : पुण्यातील पोटनिवडणूकीवरून सध्या राज्यातील राजकीय वातावरण चांगलचं तापल्याचं पाहायला मिळत आहे. कसबा पेठ आणि चिंचवड मतदार संघातील आमदारांचे निधन झाल्यानंतर ही पोटनिवडणूक जाहीर झाली आहे.

या निवडणूकीत भाजप विरोधात महाविकास आघाडी यांच्यात प्रमुख लढत पाहायला मिळत आहे. दरम्यान या निवडणूकीत मनसेने भाजपला पाठिंबा जाहीर केला आहे. यावर केलेल्या संजय राऊतांच्या टीकेला मनसेने जोरदार प्रत्युत्तर दिलं आहे.

मनसेचे नेचे संदीप देशपांडे यांनी सामना वृत्तपत्रात छापून आलेल्या पंतप्रधान नरेंद्र मोदी यांच्या एका जाहीरातीवरून टोला लगावला आहे. त्यांनी या जाहीरातीचा फोटो ट्वीट केला आहे. तसेच देशपांडे यांनी सरकारी जाहिरातीच्या पैशांवर चालणाऱ्या सामनामधून पगार घेणाऱ्यांची आमच्याबद्दल बोलायची लायकी नाही जाहिराती बंद तर पगार पण बंद "चड्डीत राहायचं ", असं ट्वीट केलं आहे.

गेल्या अनेक दिवसांपासून या पोटनिवडणूकीत मनसेची भूमिका काय असणार याकडे सर्वांचे लक्ष लागून होते. त्यानंतर मनसेने भाजपला या पाठिंबा देण्यात आल्यानंतर उद्धव ठाकरे गटाचे नेते संजय राऊत यांनी खोचक शब्दात टीका केली होती. संजय राऊत यांनी टेबला खालून जे व्हायचं ते आता टेबला वरून होतंय एवढंच असं म्हणत मनसे पहिल्यापासूनच भाजप सोबत असल्याचा दावा केला होता.