शिर्डी (जि.अहमदनगर) : भाजपचे नेते राधाकृष्ण विखे पाटील यांनी परिवहनमंत्री अनिल परब यांच्यावरील ईडीने केलेल्या कारवाईवरुन मुख्यमंत्री उद्धव ठाकरे आणि राष्ट्रवादी काँग्रेसचे प्रमुख शरद पवार (Sharad Pawar) यांच्यावर टीका केली आहे. महाविकास आघाडी नव्हे तर महाभ्रष्टाचारी सरकार असल्याचा आरोप त्यांनी केला. पुराव्यांशिवाय ईडीकडून कारवाई होत नाही. नवाब मलिकांच्या प्रकरणावरुन हे सिद्ध झाल्याचे विखे पाटील म्हणाले. (Radhakrishna Vikhe Patil Attacks On Sharad Pawar Over Politics)

२०१४ मध्ये मत मोजणी सुरु असताना राष्ट्रवादी पक्षाने भाजपला पाठिंबा दिला होता. त्यावेळी त्यांना भाजप जातीवादी वाटले नसल्याचे ते म्हणाले. शरद पवार यांना सोयीप्रमाणे भूमिका बदलताना जनतेने बघितले असून उद्या भाजपचे समर्थन करायला लागले तर आश्चर्य वाटू नये, असा टोला राधाकृष्ण विखे पाटील (Radhakrishna Vikhe Patil) यांनी पवार यांना लगावला आहे. राज्यात लूट सुरु असून जनता त्याचे परिणाम भोगत आहे.

लोकांचा अधित अंत पाहू नये, असा इशारा त्यांनी सरकारला दिला. सर्व भ्रष्ट मंत्र्यांना घरी पाठवावे. मुख्यमंत्र्यांनी आपला दर्जा टिकवावा, असे आवाहन त्यांनी केले.