मुंबई : राज्यासभेच्या सहा जागांसाठी आज मतदान पार पडले असून, आता विजयाची माळ नेमकी कुणाच्या गळ्यात पडणार याकडे सर्वांचे लक्ष लागून राहिले आहे. दरम्यान, पाच वाजता पार पडलेल्या निवडणुकांच्या मतमोजणीला सुरुवात होणे अपेक्षित होते. परंतु, भाजपने (BJP) मविआच्या तीन जणांनी मतदान प्रक्रियेत नियमांचा भंग केल्याचा आरोप करत आयोगाकडं तक्रार केली आहे. त्यानंतर आता शिवसेनेनंदेखील (Shivsena) अपक्ष आमदार नवनीत राणा आणि भाजप नेते सुधीर मुनगंटीवर यांचे मत बाद करावे, असे म्हणत थेट निवडणूक आयोगाकडे तक्रार दाखल केली आहे. (Maharashtra Rajyasabha Election Update News)

शिवसेनेकडून रवी राणा आणि सुधीर मुनगंटीवार (Sudhir Mungantiwar) यांच्याविरोधात केंद्रीय निवडणूक आयोगाकडे तक्रार करण्यात आली असून, यामध्ये मतदानावेळी नियमांचे उल्लंघन केल्याचा आरोप करण्यात आला आहे. सुधीर मुनगंटीवर यांनी निवडणूक प्रतिनिधी व्यतिरिक्त इतर व्यक्तीला मतपत्रिका दाखवल्याचे तर, रवी राणा यांनी हनुमान चालीसा दाखवून मतदान केल्याचे शिवसेनेनं तक्रारीत म्हटले आहे. हनुमान चालीसा दाखवून इतर कुणाला मतदान केले हे उघड करणे म्हणजे नियमांचे भंग असल्याचे शिवसेनेनं तक्रारीत म्हटले आहे.

ईडीचा डाव फसला आता रडीचा डाव सुरु : राऊत

महाराष्ट्रातील राज्यसभेच्या सहा जागांसाठी आज मतदान पार पडलं. पण दीड तास उशीर झाला तरी अद्याप मतमोजणीला सुरुवात होऊ शकलेली नाही. यापार्श्वभूमीवर शिवसेना खासदार संजय राऊत यांनी ट्विट केलं असून "ईडीचा डाव फसला आता रडीचा डाव सुरु" अशा शब्दांत भाजपवर टीका केली आहे. राज्यसभा निवडणुकीची मतमोजणी का व कोणी थांबवली आहे? ईडी चा डाव फसला! आता रडीचा डाव सुरू झाला!! आम्हीच जिंकू! जय महाराष्ट्र!!