स्वाभिमानी शेतकरी संघटनेत लवकरच फूट फडणार अशा चर्चा सध्या राजकीय वर्तुळात सुरू आहेत. यादरम्यान शेतकरी नेते रविकांत तुपकर यांनी आपण दुसऱ्या कुठल्याही पक्षात जाणार नसून स्वाभिमानी शेतकरी संघटनेतच काम करत राहणार असल्याचे स्पष्ट केले आहे.

शेतकरी स्वाभिमानी संघटनेच्या शिस्तपालन आणि कोअर समितीची आज पुण्यात बैठक बोलवण्यात आली आहे. या बैठकीला रविकांत तुपकर उपस्थित राहणार नाहीयेत. यादरम्यान त्यांनी राजू शेट्टी यांच्या कानावर मी माझी नाराजी घातली असल्याचे म्हटले आहे. त्यांनी सांगितलं की, मी कालच फोन करून समितीच्या बैठकीला येणार नाही असं त्यांना कळवलं होतं. मी वारंवार माझ्या आक्षेप त्यांना सांगितले आहेत, त्यामुळे निर्णय त्यांना घ्यायचा आहे. त्यामुळे मी बैठकीला येणार नाही असे तुपकर म्हणाले. तसेच मी दुसऱ्या पक्षात जाणार या अफवा कृपया थांबवा, अशी विनंती देखील रविकांत तुपकर यांनी यावेळी केली.

मला संघटनेत राहूनच शेतकरी चळवळीचं काम करायचं आहे. माझ्या दृष्टीने शेतकरी माझा आत्मा, माझा प्राण आहे. रक्ताच्या शेवटच्या थेंबापर्यंत शेतकऱ्यांसाठी लढत राहायचं आहे. हा निर्णय मी घेतला असून आजपासून मी कामाला लागसो आहे असे रविकांत तुपकर म्हणाले. माझे आक्षेप, नाराजी आणि महाराष्ट्रातील कार्यकर्त्यांचं दुखणं राजू शेट्टी यांनी सांगितलं आहे. ते पुन्हा-पुन्हा कितीदा सांगायचं. हे मागील पाच वर्षांपासून सुरू आहे. त्यामुळे याबद्दल सकारात्मक निर्णय आणि अंमलबजावणी राजू शेट्टी यांनी करावी असेही तुपकर म्हणाले आहेत.

दरम्यान आज पुण्यात होणाऱ्या बैठकीत काय निर्णय घेतला जातो याकडे सर्वांचे लक्ष लागले आहे. तसेच शेतकरी स्वाभिमानी संघटनेत फूट पडणार की नाही हे पाहावे लागणार आहे.