मुंबई : भारतरत्न लता मंगेशकर (Lata Mangeshkar Passes Away) यांचं रविवारी निधन झालं. त्यांच्या पार्थिवावर मुंबईतील शिवाजी पार्क येथे अंत्यसंस्कार (Lata Mangeshkar Funeral) करण्यात आले. पण, याठिकाणी मराठी कलाकार दिसले नाहीत, अशी चर्चा रंगली होती. मराठी कलाकारांना प्रवेश नाकारल्याचेही वृत्त होते. त्यावरूनच आता काँग्रेसचे युवा नेते सत्यजित तांबे (Satyajeet Tambe) यांनी सांस्कृतिक मंत्री अमित देशमुख यांना पत्र लिहिले आहे.

पत्रात नेमकं काय म्हटलं? -

मराठी चित्रपटसृष्टीतून लता दीदींच्या अंत्यसंस्कारासाठी कोणीही गेलं नाही, अशी टीका समाजमाध्यमातून झाली. माझ्या मनात देखील हा प्रश्न आला होता. परंतु लता दीदींच्या अंत्यसंस्काराला येऊ इच्छिणाऱ्या अनेक मराठी कलाकारांना शिवाजी पार्कवर प्रवेश देण्यात आला नाही, हे समोर आले तेव्हा मला खूप वाईट वाटले. मराठी कलाकारांना प्रवेश नाकारताना प्रोटोकॉलचे कारण पुढे करण्यात आले. प्रोटोकॉल आणि सुरक्षा या गोष्टी मला मान्य आहेत. पण, अशा महत्वाच्या प्रसंगी मराठीतील छोटे-मोठे कलाकार झाकोळले जातात. ग्लॅमर कमी असल्याने त्यांच्याकडे कोणी लक्ष देत नाही. मुंबईत होणाऱ्या अनेक महत्वाच्या कार्यक्रमांमध्ये मराठी कलाकारांना प्रवेश नाकारण्याचे प्रकार अनेकदा घडले. मराठी कलाकारांना नेहमीच अवहेलनेला समोरे जावे लागते. भारतीय चित्रपट सृष्टीची निर्मिती मराठी माणसाने केली असताना मुंबईत मराठी कलाकारांना तुच्छेतेची वागणूक मिळते हे योग्य नाही, असं सत्यजित तांबे यांनी पत्रात म्हटलं आहे.

''आम्हाला प्रवेश मिळविण्यासाठी खूप अडचणी आल्या'' -

''लता दीदींच्या अंत्यसंस्कारासाठी शिवाजी पार्कवर गेलो. पण, प्रवेशद्वारातून आत सोडलं नाही. शेवटी खूप विनंती केल्यानंतर आत सोडलं. पण, आम्हाला थांबवून ठेवण्यात आलं. इतक्यात अमिर खानसारखे मोठे बॉलीवूड कलाकार आले त्यांना थेट आमच्या बाजूनं आत सोडलं. गोष्ट जेव्हा भांडणावर आली त्यावेळी दोन महिला पोलिस टाळी देऊन हसत होत्या आणि तुम्ही कलाकार असेल तरी आम्ही तुम्हाला सोडणार नाही, असं म्हटलं. मराठी कलाकारांना मराठी पोलिसांनी रोखलं'', असं अभिनेत्री हेमांगी कवीनं तिच्या पोस्टमध्ये लिहिलं होतं.