Mumbai News : ज्येष्ठ अभिनेते तथा राज्यात वृक्षसंवर्धनाची चळवळ राबवून देवराई फुलवणारे अभिनेते सयाजी शिंदे यांनी आज मंत्रालयामध्ये उपमुख्यमंत्री अजित पवार यांची भेट घेतली.

राज्य शासनाकडे वन विभागाची हजारो हेक्टर जमीन आहे. परंतु त्यात वृक्षसंवर्धन होत नाही. केवळ बोर्ड लावून जागा रिकामी पडून आहे. त्यामुळे त्या जागेत देवराई फुलवण्यासाठी मदत व्हावी, यासाठी अभिनेते सयाजी शिंदे यांनी अजित पवारांची मंत्रालयात भेट घेतली.

यावेळी माध्यमांशी बोलताना सयाजी शिंदे म्हणाले की, आज अजित पवार यांच्यासह देवेंद्र फडणवीसांचीही भेट होणार होती. परंतु ते जपानच्या दौऱ्यावर गेले आहेत. वृक्षसंवर्धनाच्या चळवळीत आम्हाला कसलाही फायदा नकोय. बायोडायव्हर्सिटीचे केवळ बोर्ड लागलेले आहेत. त्यात आम्हांला पडायचं नाहीये. परंतु आम्ही जे करतो त्याला सपोर्टची गरज आहे.

वनविभाग, महसूल विभागाचा सपोर्ट मिळतोय, परंतु काही अधिकारी या टेबलावरुन त्या टेबलावर करतात, त्यामुळे वेळ वाया जातो. त्यांचंही सहकार्य मिळावं, यासाठी अजित पवारांची भेट घेतल्याचं त्यांनी सांगितलं.(Latest Marathi News)

सयाजी शिंदे पुढे म्हणाले की, अजित पवार यांच्याशी बोलताना एक नवीन संकल्पना मांडली. वृक्ष प्रसाद योजना, असं या उपक्रमाचं नाव आहे. आपण सिद्धीविनायक, महालक्ष्मी दर्शनाला जातो. त्यावेळी अभिनेषक करतो. तेव्हा जे झाड देवाला आवडतं ते भेट देण्यात येईल आणि त्याचं संवर्धन होईल. त्यामुळे हा उपक्रम सुरु करण्याची मागणी केल्याचं शिंदेंनी स्पष्ट केलं.