सांगली: अहिल्यादेवी होळकर यांच्या स्मारकाचा लोकार्पण सोहळा राष्ट्रवादीचे नेते शरद पवार (Sharad Pawar) यांच्या हस्ते आज पार पडला. यावेळी शिराळा विधानसभा मतदार संघातील माजी राज्यमंत्री शिवाजीराव नाईक (Shivajirao Naik) यांनी शरद पवार यांच्या उपस्थितीत राष्ट्रवादीत (NCP) प्रवेश केला.राष्ट्रवादीत प्रवेश केल्यानंतर शिवाजीराव नाईक यांनी शरद पवार यांचे कौतुक केले. महाराष्ट्राचा विकास फक्त शरद पवारचं करू शकतात असेही ते म्हणाले.

यावेळी बोलताना ते म्हणाले, राज्याचा विकास केवळ शरद पवार साहेब करू शकतात. आजच्या शुभदिनी राष्ट्रवादी काँग्रेसमध्ये प्रवेश करणे हे शुभचिन्ह आहे. आजच्या कार्यक्रमातून शरद पवार यांचा विचार संपूर्ण राज्यभर पसरेल असेही ते म्हणाले. पुढे ते म्हणाले, शरद पवार यांचे राज्यातील सर्व कार्यकर्त्यांच्या कामावर बारीक लक्ष असतं. आमच्या भागात नोकऱ्यांचे प्रश्न ते सोडवतील असा विश्वास त्यांनी यावेळी व्यक्त केला.

यावेळी जयंत पाटील यांनी भाजपावर टीका केली ते म्हणाले, शरद पवार साहेब विकासाची मोठी शक्ती आहे. गुढीपाडव्याच्या दिवशी नाईक यांचे स्वागत करत असताना आनंद होतोय. भाजप रोज म्हणत मंत्री फुटणार, आमदार फुटणार आम्ही बोलत नाही काम करतो. येणाऱ्या निवडणुकीत राज्यात सर्वात मोठा पक्ष म्हणून राष्ट्रवादी काँग्रेस पक्ष समोर आल्याशिवाय राहणार नाही असा सूचक इशाराही त्यांनी दिला.