शरद पवार यांनी राष्ट्रवादीच्या अध्यक्षपदावरून निवृत्त होणार असल्याची घोषणा दोन दिवसांपूर्वी केली आहे. त्यानंतर सुप्रिया सुळे राष्ट्रवादीच्या अध्यक्षा होणार असल्याची चर्चा राज्याच्या राजकारणात सुरू आहे. त्यावर शिवसेनेचे नेते आणि कृषीमंत्री अब्दुल सत्तार यांनी प्रतिक्रिया दिली आहे. सुप्रिया सुळे अध्यक्षा झाल्या तर तो त्यांच्या पक्षाचा अंतर्गत प्रश्न आहे. माझ्या आवडण्याने न आवडण्याने फरक पडला असता, तर मी माझी प्रतिक्रिया दिली असती, असं अब्दुल सत्तार यावेळी म्हणाले आहेत.

शरद पवार देशाचे ज्येष्ठ नेते आहेत. त्यांनी काय करावं, हे माझ्या सारख्या कार्यकर्त्याने सांगण्याची गरज नाही. ते सक्षम आहेत. त्यांच्या पक्षाचा निर्णय घेण्याचा अधिकार पक्ष प्रमुखाला असतो. तो त्यांनी घेतला आहे. अंतिम निर्णय तेच घेऊ शकतात. मी त्यांच्या पक्षाबद्दल बोलण्याइतका मोठा पुढारी नाही, असंही पुढे मंत्री अब्दुल सत्तार म्हणाले आहेत.

शरद पवार यांनी राष्ट्रवादी काँग्रेसचे अध्यक्षपद सोडण्याचा निर्णय दोन दिवसांपूर्वी कार्यक्रमात घेतल्यानंतर, राजकीय वर्तुळात एकच खळबळ उडाली. राष्ट्रवादीच्या कार्यकर्त्यांनी तर पवारांनी आपला निर्णय मागे घेण्याचा हट्ट धरला. शरद पवार यांच्या या निर्णयानंतर राज्यसह देशभरातील नेत्यांच्या प्रतिक्रिया समोर येऊ लागल्या आहेत.

राष्ट्रवादी काँग्रेसचे संस्थापक अध्यक्ष शरद पवार यांनी पक्षाच्या अध्यक्षपदाचा राजीनामा दिल्यानंतर आता पक्षाचे नवे अध्यक्ष कोण असा प्रश्न उपस्थित होत आहे. यामध्ये अजित पवार, सुप्रिया सुळे, जयंत पाटील, प्रफुल पटेल ही नवे चर्चेत आहेत.