Supriya Sule News : राष्ट्रवादीचे ज्येष्ठ नेते छगन भुजबळ (Chhagan Bhujbal) यांनी पुण्यात केलेल्या वादग्रस्त वक्तव्यामुळं ते चांगलेच अडचणी सापडले आहेत. त्यावर खासदार सुप्रिया सुळे (Supriya Sule) म्हणाल्या, एखाद्या मुद्द्यावर मत मांडणं यात काही चुकीचं नाही. छगन भुजबळ यांनी मांडलेला विचार आहे. याबाबत भेटल्यावरती नक्कीच मार्गदर्शन घेईल. कोणीही मत मांडलं म्हणजे तो शत्रू झाला असं होत नाही, असं सुळेंनी नमूद केलंय.

दरम्यान, सुळेंनी सातारा जिल्ह्याचे पालकमंत्री शंभूराज देसाई (Shambhuraj Desai) यांच्या विधिमंडळाच्या पायऱ्यांवरील वक्तव्याचा देखील चांगलाच समाचार घेतलाय. त्या म्हणाल्या, देसाईंचं वक्तव्य टिव्हीवर ऐकलं. तुम्हाला पण खोके हवे आहेत का? असं त्यांनी आम्हाला म्हटलं. त्यांच्या या विधानानंतर आम्हाला खूप दुःख होतंय, असंही सुळेंनी नमूद केलं. एवरी थिंग इज ओके! तुम्हाला हे सगळं ओके वाटत असेल, पण आम्ही यासाठी राजकारणात आलो नाही. आम्ही राजकारणात आलो ते सगळ्यांच्या आयुष्यात बदल घडवण्यासाठी स्वतःच्या स्वार्थासाठी नाही, असा टोला सुप्रिया सुळेंनी शंभूराज देसाईंना लगावला.

शिंदे गटानं बंडखोरी केल्यानंतर शिवसेनेत (Shiv Sena) फूट पडली आहे. त्यामुळंच शिवसेना कोणाची हा प्रश्न उपस्थित झालाय. याप्रकरणी सुप्रीम कोर्टात (Supreme Court) लढाई सुरू आहे. ही लढाई दुर्दैवी असल्याचं मत खासदार सुळेंनी व्यक्त केली. बाळासाहेब ठाकरे यांचं नाव चालतं, सगळं काही चालतं. मग, बाळासाहेबांसाठी सर्वस्व असलेला मुलगा आणि नातू त्यांना का चालत नाही? असा सवालही त्यांनी माध्यमांशी बोलताना उपस्थित केला.